Hukum ka ïingkashari Meghalaya High Court ban pynsangeh ia ka jingpom dieng ha East Khasi Hills

Syllad | The Rising MeghalayaFebruary 8, 2025

Ka Iingkashari Meghalaya High Court ha ka 7 tarik Rymphang ka la hukum ia ki bor sorkar ba kin pynsangeh shwa ia ka jingpom ne pynkhyllem dieng bad ban bishar thymmai ia kiba kum kine ki rai khnang ban pynthikna ba ka jingpom dien ka dei ban long katkum ka lynti jong ka ain.

Haba pynmih ia kane ka hukum hadien ka jingbishar ia ka PIL halor kane ka phang, ka bench jong u Chief Justice IP Mukerji bad u Justice W Diengdoh ka la ong, “Ha kaba iadei bad ka rai ba la dep shim ban shah pom dieng hynrei ha kaba ka jingpom ia ki dieng kam pat shym la iaid haduh mynta, ki bor ba dei khmih ki dei ban pynsangeh shwa ia ka jingpom dieng bad ban bishar biang ia ka rai khnang ban pynthikna ba ki la iaid katkum ka ain.”

Ka la hukum ruh ia ki bor sorkar ba kin pyntip ia baroh ki aplikeshon kiba dang sahteng na ka bynta ka jingpom dieng hapoh ka thain East Khasi Hills.

“Kin hap ban pynthikna ba baroh kine ki aplikeshon kin iaid bad pyntreikam pyrkhing katkum ka Ain bad Rule. Ka dei ruh ban kdew ia ka jinglong jong ka rukom treikam ba la bud bad ka jingmih jong kawei pa kawei na kine ki aplikeshon ba dang sahteng,” ong ka bench.

“Lada ka la dep don ka jingpom dieng beain bad ka bym lah shuh ban leh ei ei, ngi bthah ba ha kano kano ka jaka ba pynkhyllem ia kine ki dieng, ki nongshah mudui kin shim ia ka sienjam ban thung dieng biang bad la kumno kumno kum ki juh ki jait dieng khnang ban pynjyrngam biang ia ka thain kumba ka dei ban long,” ka la bynrap.

Ia kane ka PIL la mudui da u Bah Geraldine G Shabong uba la kyrpad ia ka iingkashari ba kan pynsangeh ia ka jingpom dieng beain da ki bor sorkar ha ki bynta jong ka thain Lower New Colony, Laitumkhrah.

Hynrei, haba khmih halor ka rukom long rukom man, ki jingktah jong kane ka jingmudui, ka Iingkashari ka la rai ban kynthup ia baroh kawei ka East Khasi Hills District hapoh kane ka jingmudui bad kane ka hukum.

Ha kane ka jingmudui, u nong mudui u ieng halor ka nongrim jong ka Meghalaya Tree (Preservation) Act, 1976 bad ka Meghalaya Tree (Preservation) Rules, 1976 kaba la ong ba shwa ban aijingbit ban pom ia ki dieng ha ka jylla, dei ban thoh da ka aplikeshon da u Divisional Forest Officer ha ka Form-1 jong ka Rule bad bud da ka jingtohkit da u Divisional Forest Officer hashwa ban ai jingbit.

Ka skhim Nagar Van Yojana (NVJ) jong ka Sorkar India ha u snem 2020, ka la khanglad ïa ka jingpom dieng bad ka la pynshlur ïa ka “jingpynlong khlaw ha sor”, la pynpaw u nongmudui.

“Da kaba ai katto katne ki nuksa, u nongmudui u la pyrshang ban pynsngewthuh ia ngi ba khlem da bud ia ka rukom treikam kaba dei, ki nongshah mudui ki la pom khlem da pyrkhat ia ki dieng ha katei ka jaka ba la kdew haneng, halor ki jingujor ba la pynpaw da ki riew shimet ba ki dieng ki khanglad ia ka jingrung ne jingmih ne ki ieng ha ka jingma.

Kum kane ka jingpom dieng ka kynthup ruh ïa ka jingpom ïa ki dieng kiba la rim palat shispah snem,” ong ka hukum.

U ND Chullai, u AAG uba iasaid na ka bynta ki nongshah mudui u la file iaka affidavit ha ka 18 tarik u Ïaïong, 2024 da kaba pyrshang ban pynshisha ïa ki jingkynnoh. Ngim lap kano kano ka jingbatai ha ka ba la bud ne em ïa ka rukom treikam ha ki kyndon ba la kdew haneng.

Shuh shuh, ka ïingbishar ka la bthah ïa ka jylla ban aiti ïa ka kaiphod ba la leh haduh ka 28 tarik u Rymphang