Hukum ka Lokayukta ban ym sam ia ki tin sopiing kat bym pat dep ka jingtohkit

Syllad | The Rising MeghalayaJuly 3, 2024

Ka Meghalaya Lokayukta ha ka 2 tarik Naitung, ka la hukum ia ka Tnat Housing ba kan pynthikna ba kam dei ban kit ne sam ia ki tin sopiing aluminium sha ki nongioh jingmyntoi katba ym pat dep ban aiti ia ka kaiphot jingtohkit kat haduh ka 3 tarik u Nailur 2024.

Lyngba kane ka hukum, u Chairperson ka Lokayukta u Bah Bhalang Dhar u la bthah ia u Deputy Superintendent of Police (Crime) u Bipul Das ba un pynlong ia ka jingtohkit halor ka jingkynnoh pynpoi da ki tin sopiing ki bym bha bad kiba tad dor sha ki Community & Rural Development (C&RD) Block jong ki 7 tylli ki District hapoh Ri-lum Khasi bad Jaintia.

“La sakhi ia ka shithi kaba 28 tarik Jylliew 2024 ba la ioh pdiang na ka ophis ka Director General of Police (DGP) Meghalaya kaba la thung ia u Bipul Das, MPS Deputy Superintendent of Police (Crime) sha ka Lokayukta. La bthah ia u Bipul Das ba un pynlong ka jingtohkit ia ki mar, ki jingtip bad ki kot ki sla ba la lum, un pan ia ki jingpynshai halor ki jingkynnoh ba la pynmih ha ka form jingujor bad hadien ba la ioh pdiang ia kine na ki ophisar bad ki bor ba dei khmih un sa aiti ia ka kaiphod hapoh jong ka 3 tarik u Nailur 2024,” u la ong.

“Ha kaba iadei bad ki tin sopiing kiba don ha ki kudam, ym dei ban pynkhih ia ki na kine ki jaka kumba ki long haduh mynta, kata ym dei ban kit, buh bujli ne sam sha ki nongioh jingmyntoi,” ong shuh shuh u Bah Dhar lyngba ka hukum.

Ia kane ka hukum la pynmih hadien ka jingshong bishar ia ka jingujor ba la mudui da u President jong ka ka Seng Hynniewtrep Youth Council (HYC).