Hukum ka Meghalaya HC ban pynkhuid noh ia 5 lak MT u dewiong ba lum thup hapoh une u bnai

Syllad | The Rising MeghalayaDecember 12, 2023

Ka iingbishar Meghalaya High Court haka 11 tarik Nohprah, ka la hukum ban pynkhuid noh ia baroh u dewiong ba la lum thup uba don 5.50 lak metric ton kat haduh kaba kut jong une u bnai Nohprah.

Haka hukum kaba la pynmih ka bench ne ka kynhun nongbishar ba kynthup ia u Chief Justice (Acting) HS Thangkhiew bad u Justice W Diengdoh ka ong, “La ioh lum jingkhein ba haduh 5,50,000 MT u dewiong uba dang lum thup ha ki jaka buh ki dei ki ban dang hap pyniaid bad die lilam da ka Coal India bad katkum ka hukum jong ka Single Member Committee jong u Justice Katakey, ia une u dewiong dei ban pynkhuid noh hapoh jong une u bnai Nohprah 2023. Kumta ruh la khmih lynti ba ia une u dewiong uba dang sahteng yn lah ban pynkhuid noh ha kaba kut jong une u snem.”

U Superintendent of Police (SP) ka East Jaintia Hills, u ba la wan mih da lade ha kane ka sngi, u la aiti ia ki sienjam ia kiba dei ban shim halor kane ka bynta bad ia u dewiong ba la ithuh ha kito ki jaka ba la lum thup hapoh ka 18th interim report ha kaba la pynpaw ba u don 4800 MT u dewiong ba la ioh kurup.

Na ka liang u Advocate General ruh u la aiti ia ka kaiphot kaba iadei bad baroh ki sienjam ba la shim kumba la kdew ha ka 18th interim report bad kaba dang don hapoh ka jingkhmih jong u  Justice BP Katakey (retired), u ban dang file ia kawei pat ka report.

Ka iingbishar ka la pynpaw ba khlem da ioh ia ka kaiphot kaba thymmai, yn ym lah ban ai ia ka rai kaba khatduh ia mynta hi. Kumta ka la hukum ban rah ia kane ka kam sha ka 19 tarik Nohprah ban ap ia ka kaiphot jong u Justice Katakey, kata halor ka report ba la pan na u Deputy Commissioner bad kiwei pat ki bor sorkar ha kaba iadei bad u dewiong ba la kdew ha ka 18th interim report.

Ka iingbishar ka la ong ruh ba ka jingwan mih u Superintendent of Police, East Jaintia Hills da lade hi ka dei ka bynta kaba dang hap pynsahteng khnang ban ap shuh shuh ia ki jinglong jingman ha kaba iadei bad kane ka bynta.

Ha kaba kut jong ka jingshim bishar haka 11 tarik Nohprah, ka iingbishar ka pyntip ba ki dang shu ioh pdiang ia ka 19th interim report na ka Single Member Committee jong u  Justice BP Katakey (retired).

 “Namar kane ka kam kaba dang sahteng bad ka jingkhim jong ka por ban shong bishar, yn pynioh ia ki copy kiba iadei bad kane ka report hapdeng ki kynhun kiba don bynta. Ka iingbishar ka khmih lynti ruh ba ha ka tarik ka ban wan, yn ioh pdiang ia ka jingpynshai bad halor ki jinglapdien, lada ki don ha kane ka report ba la kdew,” ong ka hukum ka iingbishar.