Hukum ka MSPCB ia ka Star Cement ban siew ia ka bai lutksan ba pynkhein ia ki kyndon halor ka mariang

Syllad | The Rising MeghalayaDecember 20, 2024

Ka Meghalaya State Pollution Control Board (MSPCB) ka la hukum ia ka karkhana dewbilat, ka Star Cement Limited ba ka dei ban siew ia ka bai lutksan kaba long T.1,20,000 namar ka jingpynkhein kaba da thmu ia ki kyndon Section 21 jong ka Air (Prevention & Control of Pollution) Act, 1981 bad Section 25 bad 26 jong ka Water (Prevention and Control of Pollution) Act, 1974.

Lah ban kdew ba ka Star Cement ka dei kawei na ki karkhana pynmih dewbilat kaba don hapoh East Jaintia Hills District bad kaba don ia ka karkhana treikam jong ka ha ka shnong Lumshnong.

Katkum ka hukum, ia kane ka bai lutksan kaba iadei bad ka mariang ka dei ban siew hapoh jong ka 15 sngi naduh ka tarik ba ioh pdiang ia kane ka jingbthah, kata ha ka rukom jong ka Demand Draft Lane ka Banker’s Cheque sha u Member Secretary ka MSPCB, Shillong.

Kane ka hukum ka maham ruh ban shim ia ki sienjam jong ka ain pyrshah ia ka Star Cement Limited katkum ki kyndon jong ka Act bad Rule lada jia ba kim lah ban pynurlong ia kane.

Ia kane ka hukum la pynmih hadien ba ka Board ka la ioh ia ka jingtip ba ka State Cement ka la pynkhein ia ki kyndon jong ka jingmynjur ha ka jingtreikam bad hadien ka jingpynmih ia ka lyer jakhlia na ki unit jong ka naduh ka 16 tarik u Nohprah 2024.

Ka Board ka la khmih da ka jingsngewkhia namar la lap ba ki kor peit bniah ia ka jingpynmih lyer jakhlia (Online Continuous Emission Monitoring Systems) jong ka karkhana la shem ba kim shym la treikam.

“Ka M/S Star Cement Limited ka la thmu khnang ha ka jingpynkhein ia ka Section 21 jong ka Air (Prevention &Control of Pollution) Act, 1981 bad Section 25 & 26 jong ka Water (Prevention and Control of Pollution) Act, 1974 bad ka Terms and Conditions of the Consent to Operate from the Board,” ong u kyrwoh ka MSPCB.