Hukum ka Sorkar Jylla ia ki bor District bad Tnat Pulit ban pynsangeh ia ki kam tih dewiong beain

Syllad | The Rising MeghalayaNovember 25, 2023

U Symbud Myntri Rangbah ka jylla uba khmih ia ka Tnat Kam Pohiing, u Bah Prestone Tynsong haka sngi Thohdieng u la ong ba ka Sorkar jylla ka la hukum ia ki bor pyniaid District bad ia ka Tnat Pulit ba ki dei ban pynsangeh mardor ia ki kam tih dewiong beaiñ bad kiwei kiwei pat ki kam beain ha ka jylla.

Haba kren sha ki lad pathai khubor, u Bah Tynsong u la ong ba ki Sorkar ki leit bad ki wan, hynrei ki kam tih dewiong beain kim dei shuh ki jingjia kiba dang thymmai, bad ha ka jingshisha kane ka la sdang naduh ki snem 2014 ter ter, kata naduh ka por ba ka  National Green Tribunal (NGT) ka la khang pyrshah ia ka kam tih dewiong ha ka jylla Meghalaya.

“Ka jingkynnoh ba kane ka sorkar ba mynta ka la shu leh klet halor kane ka mat Nga tharai kam long kaba shonghok bad kam don ruh ka jingshisha hangno hangno ruh,” u la ong.

Nalor kata u la ong ba ki bor jong ka ain ki la don ban tehlakam ia ka jingtih dewiong beain bad halor kiwei pat ki kam kiba long beain ha ka jylla.

“Ngi la pynkhamti naduh ki bor pyniaid district haduh ki police station lane wat haduh ki block level ha kaba ngi la bthah ia ki heh sorkar ba kin long kiba peitngor bad ban khmih ba ki kam beain, kata ym tang ka kam tih dewiong kim dei ban jia ha ka jylla Meghalaya,” ong u Symbud Myntri.