Hukum tohkit u Myntri ka Tnat Housing halor ka jingkynnoh leh thok ha ka jingthied tin sop ïing

Syllad | The Rising MeghalayaJune 24, 2024

U Myntri ba dei khmih ia ka Tnat Housing u Marcuise N Marak ha ka 24 tarik Jylliew, u la hukum ban pynlong ia ka departmental enquiry ban tohkit bniah halor ka jingkynnoh kaba iadei bad ka jingleh thok ha ka jingthied ia ki tin sop iing.

Haba kren sha ki lad pathai khubor, u Marak u la ong, “Katkum ka kaiphot kaba Nga la ioh pdiang kam shym la don satia kano kano ka jingleh bakla, hynrei watla katta ruh nga la ioh pdiang ia ka jingujor bad kumta ruh nga la hukum ban pynlong da ka departmental enquiry.”

“Hadien ba la pyndep ia ka jingtohkit, lada ngi shem ba ki don ki jingleh bakla, ngin shim ia ki sienjam ban blacklist ia ka kompeni bad ngan pynthikna ba lada don ki ophis kiba donkti ngin sa leh tyngeh kumjuh ruh ia ki ophisar,” u la ong.

Ha ka 20 tarik Jylliew, ka seng Hynniewtrep Youth Council (HYC) ka la dawa ban pynlong jingtohkit ha kaba iadei bad ka jingthied bad ka jingsam ia ki tin sop iing ki bym bha ba la wanrah da ka kompeni napoh West Bengal bad kaba long pyrshah ia ki kyndon jong ka Tnat Housing. Ka HYC ka la dawa ruh ba dei ban pynsangeh noh mardor ban sam ia kine ki tin sopiing sha ki C&RD Block ka jylla bad ruh ban pynphai noh ia ki.

Na ka liang u Marak u la ong, “Ki (HYC) ki la tei pop ia ka Directorate kumta Nga la kyntu ia u Joint Secretary na ka bynta ban pynlong ia ka jingtohkit ha ryngkat ka technical team. U la ong ruh ba kan shim por kumba 30-35 sngi namar ka donkam ban leit sha baroh ki kudam kiba don ha ka jylla, ba hadien ba la ioh ia ka kaiphot jingtohkit ngin sa pyntip biang sha phi.”    

Haba kylli u Myntri u la kam ba u la dep ban pynthkna na ka tnat bad shem ba kam shym la don kano kano ka jingleh bakla ha kaba iadei bad ka jingpynioh ia kine ki tin sop iing, bad bynrap ruh ba kine ki tin ki dei kiba la thied katkum ka jingbuh kyndon bad katkum ka jingdonkam kumba la ia mynjur bad ka kompeni.

Nalor kata u la pynshai ruh ba ka tnat ka la sam da ki aluminium corrugated sheets (ACS) ha ka jaka jong ki Corrugated Galvanised Iron (CGI)

“Ki tin sop iing CGI sheet ki dei kiba kham khia hynrei ki tin ACS ki kham sting bad kham bha bad ki dei kiba kham shan slem namar ki CGI ki dei kiba sarang kloi. Kumta ka tnat ka la rai ban shim da ki ACS lyngba ka jingkhot tender ba la leh ha u snem 2022 da ka sorkar kaba la leit. Kumta ka kompeni ka la ioh ia ka tender kaba 24 bnai kaba la kut noh mynta u snem ha  u bnai Lber ba la dep. Kumta ngim shym la don ia kano kano ka lad hynrei ban ai sha ki bad ki mar kiba ki la pynpoi ruh ki long kiba bha bad ruh katkum ki kyndon ba la buh,” ong u Myntri.

“Hynrei, watla katta u la ong namar ba kane ka seng ka la buh da ka jingujor bad leit sha ka kudam jong ka tnat Housing, kumta ruh nga la hukum ban pynlong ia ka jingtohkit. Ngin pynlong da ka jingtohkit kaba bniah bad hadien ba la dep tohkit ngan sa lah ban ai ia ka jubab la ngi la pynioh ne em ia ki juh ki mar kumba ngi la pan.Kumta ruh ngan sa pyntip biang sha phi hadien ba la pyndep ia ka jingtohkit,” bynrap shuh shuh u Myntri.

Kynnoh ka HYC ba sam ka Tnat Housing da ki tin sop iing ki bym biang wat tang ban tap sem ri jingri