Hukum u SP ka EKH ia ki Hotel bad kiwei ban register ia ka jingwan ki bar ri

Syllad | The Rising MeghalayaAugust 6, 2023

U Superintendent of Police uba dei ruh u Foreigners Registration Officer, East Khasi Hills District u la bthah ia baroh ki manager bad ki trai hotel, guest house bad kiwei pat hapoh ka district ki bym pat register ia ki user ID na ka bynta ki Hotel /Guest Houses/Lodges/Rent Houses/Inns bad kiwei pat na ka bynta ka online ‘C’ Form (C-FRO), ki dei ban pynthikna ban register bad u Superintendent of Police-cum-Foreigners Registration Officer, EKHD Shillong.

Kumjuh kito kiba la register ia ki user IDs ki dei ban phah ia ka report hapoh ka 24 kynta man ba wan poi ki briew kiba na shabar jong ka ri khlem da klet.

Nalor kata la kyntu ruh ia ki nongshongwai hapoh ki iing jong ki riew shimet / Boarding /Hostels, School, Colleges, University, Churches, Mosques, Temples bad  Hospital ruh ki dei ban pynthikna ban register kumjuh bad utei u heh ba dei khmih lada don ki bar ri kiba shong ba sah, bad pule ha ki jaka ki jong ki ha kaba iadei bad ka jingwan poi ka jong ki da ka online lyngba ka ‘C’ Form bad ‘S’ Form na ka bynta ki School, College bad University bad ruh ban phah ia ki lyngba ka online hapoh ka 24 kynta.

Nalor kata kitei ki bor ba dei khmih ki dei ban phah mardor ia ka  ‘C’ Form bad ‘S’ Form sha ka ophis u Superintendent of Police-cum-Foreigners Registration Officer, East Khasi Hills District halor ka jingwan jngoh, sah bad ka jingpule jong ki bar ri.

La kyntu ia baroh ki bor pyniaid ba dei khmih ba kin bud ryntih ia kane ka hukum ba la kdew haneng bad kano kano ka jingpynkhein ia kine ki hukum yn shim ia ki jingpynshiom ba tyngeh pyrshah ia ki bor ba dei khmih ne ki riew shimet katkum ki kyndon jong ka Foreigners Act, 1946.