Husiar na u Covid-19 ong ka FKJGP

Syllad | The Rising MeghalayaApril 2, 2020

Ka Federation Khasi, Jaintia and Garo People (FKJGP), Jaintia Hills ka la kyntu ia ki paidbah bri Hynniew trep ba ngi dei ban long kiba husiar na une u kynja khniangba shyrkhei u bym lah ban iohi da ki khmat briew jong ngi uba kyrnteng u corona virus ne u COVID-19 uba ma tam ha kane ka pyrthei. Ka seng ka khot iawer ia kiwei pat ki paralok seng bhalang bapher bapher ryngkat ki Dorbar Shnong u bri Hynniew trep ban iatreilang ryngkat ryngkat, ban peitngor ia ki briew kiba wan nabar bad ki khynnah skul kiba pule shabar, khnang ba ngi lah ban pynduh jait ia une u kynja khniang COVID-19.

Da ka jingiatreilang ym don jingeh ban pynduh jait ia uno uno ne kino kino ki jait khniang kiba ma. Ka FKJGP ka kloi ban iatreilang bad ka sorkar lada donkam ha kino kino ki bynta na ka bynta ka jingbha ban iada ban wanrah ïaka shongsuk shongshngain jong u paidbah ba bun ba lang. Kumba ka long mynta dang don shibun ki jingduna kum ki mask ban tap khmut ia ki paidbah wat ki pulit ruh kiba leh checking kim don mask.

“Ki hospital kum ki CHC/PHC ne kiwei kiwei ki jaka test ia une u khniang kim don tiar ban test, kumno kein ngi lah ban iada ne ban pynduh jait ia une u khniang. Halor kane ngi kyntu ia ka Sorkar shwa ba une u khniang un ioh ban pur sted, dei ban shimkhia mardor ban pynbiang ia kine ki tiar jingdonkam ban iada na une u khniang,” ong u Tuesday Lytep, President Ka FKJGP Jaintia Hills

Ngi kyntu ruh ia ka Sorkar ban peitngor bha khamtam ia kine ki jaka rung jaka mih (Border Area) kiba don sha border Bangladesh bad kiwei kiwei ki Border, namar katkum ka jinglum jingtip jong ka seng ka la don ka jingshim kabu ki khar Bangla ban rung tuh shapoh ka ri jong ngi.

Ka Sorkar Jylla jong ngi ka dei ban pynioh kloi ia ka pisa ki nongbylla sngi kaba la kular. Kumba ka long mynta ki nongbylla sngi kim iohlad shuh ban leit trei leit ktah na ka daw jong u COVID-19, halor kane ka sorkar ka dei ban shimkhia ia ka jingeh jong ki paidbah khnang ba kan ym don kano kano jingkthah ia ki nongbylla, la ong u Tuesday Lytep bad bynrap shuh shuh ban pynbiang ïa u khaw la ha sor ne nongkyndong ban lait na ka jingiap thngan.