HYC: 2021 u dei u snem ba ngin pynjur iaka jingiakhih ban ioh ILP, MRSSA bad kiwei

Syllad | The Rising MeghalayaJanuary 8, 2021

“U snem 2021 un dei u snem ba ngin pynlong iaka jingiakhih ba tyngeh ban dawa naka sorkar ban pyntreikam iaka ILP, MRSSA bad ban pyllait iaka jingtreikam ka CAA ha Jylla Meghalaya,” la ong Robertjune Kharjahrin President HYC.

Ula ong ruh ba ka HYC ka la rai ruh ban iakhih tyngeh ban pynbor na ki bor sorkar ba ki dei ban pynbeit noh ia u pud u sam ka Jylla Meghalaya mynta u snem.

“Dei ban pyndep noh ia ka jingbeh poiwir na Them Metor bad kumjuh ruh ia ka jingpynrung ia ka ktien khasi ha ka Eight Schedule,” la ong u Robertjune.

Ka HYC kala shim ia kane ka rai haka central executive council kaba long haka 6 tarik une u bnai ha ophis treikam jong ka ha Mawlai.

Shuh shuh u Robertjune ula ong ba ka HYC kan ia trei shitrhem bad ki seng kiba don ha ka CoMSO ban pyntikna ba ka Jylla kan ioh noh ia ka ILP bad ia ka MRSSA (Amendment Bill) 2020 bad kumjuh ruh ban pyrshah iaka CAA.

“Ka HYC kan peitngor ruh ba ka jingpynkylla ia ka Sixth Schedule lyngba ka 125 Amendment Bill ka constitution jong ka Ri India khnang ba kan ym ktah iaka jaidbynriew hynniewtrep,” la ong u Robertjune.