I-League: Pynrem ka Lajong ia ka TRAU FC da 2-1, ka jingjop kaba lai sien kynthih

Syllad | The Rising MeghalayaNovember 25, 2023

Ka Shillong Lajong FC ka la ioh ia ka jingjop kaba laisien kynthih ha kane ka lympung ialehkai I-League jong kane ka samoi hadien ba ka la lah ban pynrem noh ia ka Tiddim Road Athletic Union (TRAU) FC da 2-1 ha ka jingiakhun kaba la long haka Saitjain ha madan SSA Stadium, Polo, Shillong.

Ka jingialehkai ka la long kaba itynnad bad kaba mar iakhad watla na ka liang ka Lajong FC ka la lah ban kham banbor pyrshah ia ka TRAU-FC na Manipur. Hynrei ka TRAU-FC ka la ioh ban pynkhih jar tang hadien 13 minit jong ka jingialehkai lyngbau Robinson Singh Soraisam.

Hadien na ka liang ka Lajong ka la sdang ban ialehkai bha kum ka kynhun ha kaba ka la ioh ia ka lad ban pyniakhaid ha ka minit kaba 18 Hardu Nongbri kaba mih haka dur jong ka penalty, bad ka jingialehkai ka la kut noh da 1-1 ha ka kylla step.

Haba bteng ia ka jingialehkai ha ka kylla miet, ka Shillong Lajong ka la sdang ban pyndonkam ia ki buit ki sap ialehkai jong ka ha ryngkat ka jingioh mynsiem lyngba ki hajar ngut ki paidbah nongkyrshan kiba la wan ban sakhi.

Ha ryngkat ka jingioh mynsiem lyngba ki jingjop kiba hashwa, ka Lajong ka la iakhun borbah ban poi sha ka thong jong ka jingjop, bad shwa ban kut ka jingialehkai  u rangialehkai shadien jong ka TRAU-FC lyngba u Thomas Singh Thounaojam u la kum thep sha la ka jong ka kol ha ka minit kaba 86 bad pynskhem syndon ia ka jingjop na ka bynta ka Lajong.

Lyngba kane ka jingjop ka Shillong Lajong ka la ioh ia ka lai point bad mynta ka la kynjoh sha ka 12 point haba khein lang naduh kaba sdang jong ka jingialehkai. 

Mynta ka Lajong ka la pynkhreh ban iakhun shabar na la iing pyrshah ia ka kynhun Rajasthan FC ha ka 3 tarik u Nohprah u ban wan.