Ia kynduhlang ki samla pule barim ka Thomas Jones Synod College Jowai

Syllad | The Rising MeghalayaOctober 15, 2023

Ka Thomas Jones Synod College Alumni Association kum shi bynta ban wanrah ïaka jingïajan hapdeng ki khynnah pule barim jong ka kolej ka la pynlong ia ka Reunion hapoh College Hall jong ka Thomas Jones Synod College, Jowai haka sngi Saitjaiñ.

Ha kane ka sngi la ïadonlang ki nongpynïaid jong ka kolej, ki samla pule barim, ki nongïalam jong ka Alumni Association bad ka Kong R Dan kaba la shongthait kum ka Secretary jong ka JHADC ka la long kum ka nongkren ba kyrpang.

Ïa kane ka jingiakynduh lang la pynïaid da u Bah S. Plain, Vice President jong ka Association.

La ïoh ïa ka jingkren lamkhmat na u Rev. L. O Garod, President jong ka Alumni, ka jingkren na ka Dr. I. R Dkhar, kaba la ïaroh ïa kane ka sienjam jong ka Alumni Association.

Ka phangpdeng jong kane ka jingïakynduh ka long, ‘Building our Community through our Professional Integrity.’ Ka Kong I. R Dan, kum kawei na ki nongpule barim ha kane ka kolej ka la batai bniah bad sani bha ïa ka jingdonkam ban don ka mynsiem ba sngur bad bahok haka jingim shimet bad khamtam ha ka jingpyrshang ban tei ïa ka imlang sahlang hi baroh kawei.

La pynphuh pynphieng ia kane ka jingiakynduhlang da ki jingrwai bakyrpang na u B. Plain bad ka jingshad na L. Suchiang.