Ïa tylli ki nong Lawmei ha kawei ka Dorbar Shnong, u CB Ryntathiang kum u Rangbah Shnong

Syllad | The Rising MeghalayaDecember 15, 2020

U Acting Syiem ka Hima Mylliem, Paiem Ainam Manik Syiem u la hiar dalade hi sha ka Shnong Lawmei, Raid Shiliangum- Nongbsap, Hima Mylliem ban aiti ia ka ‘Sanad Rangbah Shnong’ sha u Bah C Bhaboklang Ryntathiang hadien ba ki nongshong shnong na ar tylli ki shnong (Lawmei Pyllun bad Lawmei Pdengshnong) ki la poi sha ka jingiatylli bad sngewthuh jingmut ban ia donlang noh tang ha kawei ka Dorbar Shnong kata ha ka Dorbar Shnong Lawmei.

Kane ka jinghiar u Paiem Ainam sha kane ka shnong ka long kum ka jingsngew kmen palat ia ka nuksa jingiatylli kiba ki nongshong shnong ki la pyni. “Ka dei ka sien ba nyngkong ka ban jia ha ka histori ka Hima Mylliem ba ki ar shnong kin wan ban ia tylli ban don hapoh ka jingialam uwei u Rangbah Shnong”, la ong u Paiem Ainam haba kren ha ka jingialang ha madan ka Shnong Lawmei uba la pynpaw ia ka jingkmen bad kyrmen ba kan long ka nuksa ia kiwei pat.

Ka dei naduh ki snem 1984-85 ter ter ba ka la don ka jingiapait shnong bad ka dei ha u 2017 ba ki riewrangbah ki la ia mir jingmut ban wanrah noh tang kawei ka Dorbar Shnong. “Ki mih ki jingiakynad ki mih ki jingbym sngewthuh jingmut hapdeng ki nongshong shnong bad khamtam ha ka jingthmu ban leh ia ki kam ban pynroi ia shnong ka thaw”, ong ki riewrangbah na ka Shnong haba kren ha kane ka jingialang

Ka ophis u Syiem ka Hima Mylliem ka la thaw da ka Joint Action Committee ban iit bniah ia ki lad ki lynti ha ryngkat ki riewrangbah ka Shnong Lawmei (kaba don mynta lai tylli ki dong) ban pyniatylli ia ka ha u snem 2017 bad dei ha kane ka sngi Nyngkong ba ki lah ban pynurlong ia kane ka jingangnud. 

U Bah Samlin Malngiang, MLA ka Sohïong u la wan ban ia donlang ha kaba u la pynpaw ia ka jingsngewkmen kaba shi katdei eh ha kaba ia dei bad kane ka jingiatylli hapdeng ki nongshong shnong. “Ngi don hapdeng ka jingïaleh ban ïoh pyntreikam ia ka ILP bad khlem ka jingiatylli kan long kaba eh bha bad kane ka dei ka nuksa ia ka jingiatylli hapdeng ki nongshong shnong ban kyntiew iwei ia iwei pat da ka jingiasngewthuh jingmut lang”, la ong u Bah Samlin Malngiang.

Kumta da kane ka jingiatylli kan wanrah ia ka jingkiew ha ka roi ka par bad ka ïoh ka kot ki nongshong shnong baroh kawei. “Nangne sha khmat ngin ia treilang ban kyntiew ia ka Shnong Lawmei sha ki kyrdan ba kham shalor ryngkat ka nuksa jong ka jingiatylli bad jingïatreilang ha bun ki liang”, la ong u Bah Samlin uba la aiti ia ki tiar Public Address System sha ka Dorbar Shnong Lawmei ha kane ka sngi.

Na ka liang u Rangbah Shnong ba thymmai ka Dorbar Shnong Lawmei, Bah C Bhaboklang Ryntathiang u la pynpaw ba kumba ki paidbah nongshong ki la bynshet ia ka lyngkor ban kit ia ka kam u long la kloi ban trei na ka bynta ka bit ka biang jong ka Shnong hi baroh kawei. “Ha ka 30 tarik u Naiwieng phi la jied ia nga kum u Rangbah Shnong hynrei marwei ngan nym lah ban leh eiei khlem ka jingïatreilang ki riewrangbah, ki samla, ki longkmie longkpa ban pyniaid beit ia ka Shnong”, u la ong.

U la ong ba u buh ha khmat ban iatreilang bad ki samla ban kyntiew ia ka imlang sahlang sha ka jingkham bha jingkham miat. Kiwei kiba la donlang ha kane ka sngi ki kynthup ia u Bah Sherbor Mawlong, MDC ka Sohïong, Bah B Sungoh, BDO ka Sohïong C &RD Block, ki Myntri na ka Hima Mylliem, U Lyngdoh bad Myntri na ka Raid Shiliangum Nongbsap, ki riewrangbah na ka Shnong lem bad kiwei kiwei pat.