Iabeh ka Jowai Co-operative Urban Bank Ltd bad kiwei ki bank, pyllait paidbah iaka debit card bad ka website

Syllad | The Rising MeghalayaOctober 13, 2021

Kan long ka sngi ka ban sah jingkynmaw iaka Jowai Cooperative Urban Bank Ltd (JCUBL) kaba la kynjoh ka jingshakri jong ka sha ka 45 snem ha Rilum Jaintia kala lah syndon ban pyllait paidbah iaka debit card bad iaka website jong ka bank haka sngi Balang.

Ia kane ka debit card bad iaka website la pyllait paidbah da u Ma MA Challam, Extra Assistant Commissioner, West Jaintia Hills District haka jingïalang kaba la pynïaid da u Bah TW. Blah Chairman of the Board of Directors ha Indoor Sports Hall Chutwakhu, Jowai.

Kane ka Bank ka dei kaba la seng naduh 26.02.1976 hapoh ka Meghalaya Cooperative Societies Act.

Ka Branch kaba nyngkong jong ka Bank ka dei haka iing shongwai ha Iawmusiang, Jowai bad la sdang ban treikam pura naduh 10 Jylliew 1977. Mynta kane ka bank kala don iaka headquarter ha Ladthalaboh.

Haka kut snem sorkar (Financial Year) 1990-91 kane ka bank kala ioh nong T.41,157 bad katba nang mih kine ki snem kane ka bank kala nang nang kyntiew iaka jingioh nong jong ka.

Plie ka Jowai Co-operative Urban Bank Ltd iaki nongkynshew pisa ban thied Share na ka bank

Ka Jowai Co-operative Urban Bank Ltd kala ioh ka jingithuh naka Reserve Bank of India (RBI) haka 30 tarik Nohprah 2009. Kane ka bank mynta ka don haduh 28000 ngut ki nongkynshew pisa.

Kane ka bank kala pyntreikam ruh iaka Core Banking System (CBS) ha u snem 2015 bad kala nang pynbna iaka jingshakri jong ka da kaba sdang ruh iaka RTGS ha u Nailar 2014. La nang pynbha shuh shuh iaka jingshakri ka bank da kaba kyntiew kyrdan iaka CBS sha ka web base ka bank ha Cloud Platform bad klala iasoh ruh bad ka PFMS jong ka Ministry of Finance kaba la iarap iaki nongkynshew pisa ban ban leh ia ka DBT.

Kane ka bank kala pyrshang ban iabeh bad ki kor ki bor mynta ne technology kum kiwei ki bank bad ka angnud ban pyndonkam iaki UPI, IMPS bad ki Mobile Banking bad ka Internet Banking.

Haba kren haka jingpyllait paidbah u kongsan u ma MA Challam ula ïaroh ïaki nongpynïaid jong ka bank halor ka jinglah jong ka ban iaid lynti na u mawjam sha u par haka juh ka por ula kyntu ïaki nongshong shnong ban shim kabu ïaki lad jingmyntoi ba ïoh lyngba kane ka bank.

Kiwei kiwei kiba kren ki kynthup ia u CEO ka bank AN Muksor, G. Sten u nongkynshew pisa haka bad kiwei kiwei.