Iabhah ki MDC ₹4 Klur ka Fund JHADC, katba ki nongtrei duh tulop 6 bnai: Andrew

Syllad | The Rising MeghalayaFebruary 27, 2020

U Ma Awhai Andrew Shullai, u CEM barim ka JHADC ula kynnoh ba ka Executive Committee kaba ïalam ka NPP bad UDP kala ïasam ïaka pisa jong ka konsil kaba la tip kum ka Council Own Fund (COF) haduh ₹4 Klur ban ïa shna skim MDC, katba ki nongtrei jong ka konsil pat ki duh tulop haduh 6 bnai mynta.

U Ma Andrew ula kynnoh ba ïa kane ka pisa la ïsam hapdeng u CEM bad ki katto katne ngut ki MDC kiba ïajan bad u tang naka bynta ka myntoi shimet jong ki, khlem da pyrkhat ïaka lawei jong ka konsil bad leh bym suidniew ïaki nongtrei kiba la duh tulop bad shem jingeh ban pyndap pynbiang ïaka jingdonkam jong ki ha ki iiing ki sem jong ki mynta 6 bnai.

“Bunsien ïaka konsil fund la ju pyndonkam haba ka konsil ka don haka jinghiran pisa bad sei naka bynta ban pynïaid shakhmat ïaki kam ka konsil, phewse kane ka EC kaba ïalam u Ma Thombor Shiwat kala pyndonkam bakla ïa kane ka pisa tang ban pynhun ïaki katto katne ki MDC kiba u don jingiajan,” la ong u ma Andrew.

“Kane ka jingleh kane ka EC kadei kaba sngewlyngngoh haduh katta katta bad nga pynrem jur ïa kane ka EC kaba ialam ka NPP bad UDP namar ba kam don ka policy treikam bad pynsyrwa ei iaka pisa ka konsil kaba buh ïaka konsil haka jingma,” ong u ma Andrew.

Ula kynnoh shuh shuh ba kane EC kala shim kylliang kumba ₹10 Klur naka Special Assistance Scheme kaba dei ban pynphai biang ia kane ka pisa, hynrei haduh mynta ka EC kaba ialam u ma Thombor kam lah shuh ban pynphai bad shakut ki kam pynroi ha kylleng ki jaka bad ki kontrak ruh kim ïoh pisa.

Ula ong shuh shuh haba ki nongtrei ka konsil kila leit ud ha khmat u CEM halor ka tulop, ka jubab u CEM ula ong ba kam ai pisa sorkar jylla, haba kadei ka juh ka sorkar ha konsil bad sorkar Jylla bad ula buh jingkylli halor kane ïano yn kynnoh.

U Ma Andrew Shullai u la ong ba ha ka dorbar kaba la dep jong ka council da ka jingthmu ban punduna iaka jinglut jingsep jong ka council, u lah wanrah da ka resolution ban pynduna ia ki nongtrei jong ka council da kaba shangeh thung kam thymmai, ha ka jaka kiba lah shong pension, hynrei kane ka EC u ma Thombor kala kyntait ban pdiang ia kane ka rai ban pynduna ïaka jinglut jingsep ka konsil.

U la ong ruh baka bhah naka khajna mar pohkhyndew kat kum ka jingtip bad ka jingkhein jong ka council ka dang dei ban ioh shuh, hynrei ka sorkar jylla ka khlem pyllait shuh khlem ki nongrim kiba shai. U la ong baka Executive Committee kaba mynta ka shu pdiang beit bad hun katba hukum ki Minister kiba nalor, khlem da iasaid iaka hok jong ka council. Hato lada kane ka EC ka dang iaid shakhmat shaei kam ialam iaka lawei jong ka JHADC jong ngi?