Ïaid beit ka jingpyngngam um ïaka blei Durga ha Rilum Jaiñtia

Syllad | The Rising MeghalayaOctober 8, 2019

JOWAI: Ka sngi kaba khatduh jong ka lehniam Durga Puja kalong kaba shongshit ha kylleng ki jaka ha East Jaiñtia Hills bad West Jaiñtia Hills bad la pynkut ïa kane ka puja da kaba pyngngam um ïaki blei haka sngi ba Ar.

Ha Jowai la leit pyngngam ïaka dur blei Durga ha Khyllem ka bynta jong ka wah Myntdu, katba ha shnong Nartiang la leit pyngngam um ïaka blei ha wah Myntang, kaba don kham ha pajih ka Durga Temple, ka Temple kaba la rim tam ïa kaba la tei da u Syiem Jaiñtiapur da ki spah snem mynshwa.

Ha East Jaiñtia Hills la pyngngam um iaki dur blei ha wah Umsalieh, ka surok ban leit sha ka shnong Rymbai ha kaba kila tih kyrpang ïaka pung ha rud ka wah.

Ha Jowai naduh ki rangbah, longkmie bad khynnah kila ïashimbynta ha kaban leit pyngngam um ïaka blei Durga sha Wah Myntdu naduh Iawmusiang haduh ka jaka ban pyngngam um ïaki blei hapoh ka jingpynïaid ka Sarbajanin Durga Puja Committee, Jowai.

Ban ïada ïaka Wah Myntdu la pyndonkam da ka jar bad ki skhen khnang ba ka jar bad ki skhen kin ioh bat iaka blei, kaba yn shim biang lashai ka sngi ban ban bret ïaki ba tam sha ka jaka ba dei ban bret.

Haba phai sha ka lehniam ha Nartiang, ka shnong Nartiang kaba dei tang maka na ki na ki shnong jong ka Jaidbynriew Khasi-Pnar kiba dang bat ïaka Niamtre- Niam tynrai ki pyndep ïaka jinglehniam Durga Puja hadpeng ka jing shongkun.

Shuwa ban rah ïaka blei durga la don ka jingshad mastieh da u Dolloi ka Elaka Nartiang u Hepsing Dhar ryngkat bad ki pator bad ki lyngdoh jong ka Elaka bad kiwei kiwei haduh ba la leit pyngngam ïaka blei ha Wah Myntang haka jinglam khmat u Pandit Oni Maskut Deshmukh bad kiwei kiwei ki riew niam lait noh ki kynthei.