Iaid beit ka jingthep vote Dolloi ha Elaka Nartiang bad Shangpung

Syllad | The Rising MeghalayaMarch 24, 2022

Ka jingjied Dolloi thymmai ha ki ar tylli ki Elaka, Nartiang bad Shangpung haka sngi Balang kala long kaba iaid beit iaid ryntih bad ka jingwan thep vote kalong 82.62 percent ha Elaka Nartiang bad 81.42 percent Elaka Shangpung.

Ka bor synshar district kala pynbiang iaki bor pahara jong ki pulit ha baroh ki jaka thep vote.

Ha Elaka Nartiang la don 4 ngut ki kyrtong kiba ïakhun ïaka kyrdan Dolloi kynthup ïa Helpmi Dhar uba la ïeng haka muhor jong ka Wait, u Jomeo Dkhar uba ïeng haka muhor jong ka Pyrla, u Leibanki Dkhar uba ïeng haka muhor jong ka Jingkieng bad u Salong Lamare uba ïeng haka muhor jong ka Sngi.

Katba hapoh ka Elaka Shangpung ki don Lai ngut ki kyrtong kiba ïakhun ïaka kyrdan Dolloi kiba kynthup ïa u Chanki Langbang uba ïeng haka muhor jong ka Sngi, u Daeiladmi Sungoh uba ïeng haka muhor jong ka Jingkieng bad u Harising Papang uba ïeng haka muhor jong u Khlur.

Ka jingdon jong ki nongthep vote hapoh ka Elaka Nartiang ka long 7196 ngut na ki 35 tylli ki Shnong katba hapoh ka Elaka Shangpung ka jingdon jong ki nongthep ka long 10,607 ngut na ki 31 tylli ki shnong ba la ïashim bynta tang da ki shynrang.

Na ki 7196 ngut ki nongthep vote ha Elaka Nartiang ka jingwan poi jong ki nongthep vote mynta ka sngi ka long 5946 ngut na baroh 15 tylli ki Polling Station. Katba hapoh ka Elaka Shangpung pat ka jingwan poi jong ki nongthep vote ka long 8637 ngut na baroh 22 tylli ki polling station.

Ka jingñiew vote kan long haka 25 tarik une u bnai.

Kumba yn shu pynkynmaw hangne ïaka jingjied dolloi bathymmai hapoh kitei ki Elaka la pynlong hadien ka jingkhlad noh jong ki Dolloi ba kynthup u Hepsing Dhar dolloi ka Elaka Nartiang uba la khlad ha u snem 2021 bad u Wenly Dhar dolloi Elaka Shangpung uba la khlad ha u snem 2015.