Iaid beit ka jingthep vote ha Mukroh bad kiwei ki shnong khappud ha Assam Meghalaya

Syllad | The Rising MeghalayaFebruary 27, 2023

Ki nongshong haki thaiñ khappud Assam Meghalaya kiba hap ha West Jaintia Hills District kila ïamih paidbah ryntih ban jied ïa la u nongmihkhmat shaka ïing dorbar thawaiñ jong ka Jylla da haka sngi Nyngkong.

U syllad.com uba la hiar da lade sha ki jaka khappud jong ka West Jaintia Hills District bad la lap ba ki paid nongshong shnong ha khappud kila mih paidbah ban jied ia u nongmihkhmat.

Haba phai sha ka shnong Mukroh ka shnong kaba la shah ktah haka shongsuk shongsain hadien ka jingshah siat iap ki riew paidbah haduh 5 ngut ha ki pulit Assam ha u bnai Naiwieng 2022, kam shym la ktah iaka jingwan thep vote u paidbah. Ka shnong Mukroh ka hap haka Mowkaiaw Constituency bad ka jingangnud hi paid nongthep vote kane ka shnong ka long ban ioh ia u pud u sam ba thikna bad ka border outpost kaba pura.

Haduh ka por 2 paje palat 1200 ngut kynthup kynthei bad shynrang kila thep iaka vote jong ki kiba dang don ha u laiñ ki don sa kumba 300 ngut tam eiei. Baroh ka vote ha kane ka shnong kala kynjoh 1596 vote

Haba u syllad ula hiar sha kawei pat ka polling station ha katei ka jaka khappud, ka Tum Tum kaba don ïa artylli ki polling kawei kadei jong ki kynthei kawei jong ki shynrang bad kane ka polling ka long kaba kyrpang namar ba ki nongshong shnong jong ka shnong Khatkasla, Psiar bad Moolber kiba dang hap haka jaka ïakjajia bad ka Assam ki thep iaka vote jong ki ha kane ka jaka.

Ka jingthep vote ha kine ki Artylli ki poling station kiba hap hapoh ka 4-Mowkaïaw Constituency ka la long haka jingpahara kaba jur ki pulit ka jylla bad ka jingïathep vote ka long kaba ïaid beit ïaid ryntih khlem kano kano ka jingïapyni bor ne jingïakhajia para nongthep vote.