Ïaid ka jingtih dewiong beaiñ ha East Jaintia Hills, phah u DC da ka appeal sha ki Waheh Shnong

Syllad | The Rising MeghalayaApril 10, 2020

U Deputy Commissioner, East Jaiñtia Hills District ula phah da ka appeal COVID-19 sha baroh ki Waheh Shnong jong ki shnong ha East Jaiñtia Hills District ba ka ophis jong u kala ioh jingtip ba ka don ka jingtih bad kit dewiong beaiñ hapoh ka district bad la kyntu ba sangeh shisyndon.

Ka appeal ka ong kumne, “Da kane nga pyntip sha phi ba hadien bala ioh bun ki report na ki Magistor mynhynin bad mynta ka sngi, ka paw tyngkrein ba dang bun ki briew ki dang iatih bad kit dewiong sop sop (illegal) hapoh ka district khlem da burom bad kohnguh shuh ia ka hukum ka Supreme Court bad ka NGT bad da ka jingleh jong kine ki briew, ka buh iaka district bad police administration ha ka jingeh namar baroh ngi tip ba ha kane ka por ngi bunkam ha ka jingiakhun bad u COVID-19, hynrei ka jingleh shim-kabu jong katto katne ki riew hehspah ki bym pyrkhat bad tip shuh ia ka jinglong briew manbriew te ka wanrah ia ka jing jahburom ia ka district hi baroh kawei.”

Kumta la kyrpad ia phi baroh ki Waheh Shnong ban iatreilang ha kum kane ka por kumne harum:

• Ba phin sngewbha ban khang noh shi syndon ia ki jingtih bad kit dewiong ba sop sop hapoh u pud u sam jong phi lyngba ka jingleit khmih bniah ia baroh u pud u sam jong ka shnong jong phi haba don kine ki par dewiong
• Ba lada don kino kino kiba ialeh pyrshah ia ka hukum jong phi, pyntip sha u SP, Pulit, Magistor bad ka Ophis jong u Deputy Commissioner.
• Ban phah peitngor da ki VDP bad Volunteer hapoh u pud u sam jong phi.
• Ba phin sngewbha ban iatreilang bad ki bor district, pulit bad Executive Magistrate ban ym ailad ia ki riew shim kabu khwan spah.

La khmih lynti iaka jing iatreilang jong phi na ka bynta ka imlang sahlang jong ka district baroh kawei.