Iaid kjat ki nongshong shnong ka Dkhiah West ha ki lynti ba iaid ki Syiem Jaintia

Syllad | The Rising MeghalayaFebruary 15, 2021

Ki 96 ngut ki nongshong shnong ka Dkhiah West, East Jaintia Hills kynthup ki longkmie longkpa bad ki samla ki la leit wad ïaki lynti ïaid kjat u longshuwa manshuwa.

Kane ka jingleit wad ïaki lynti ïaid kjat u barim ka la long haka 13 tarik une u bnai bad ki la ïaid da ka kjat kumba 12 kynta. Ki nong Dkhiah West ki la mih dangstep phyrngap da ka kjat ban leit wad ïaka lynti ïaid u barim haduh ban da poi sha shnong Borghat.

Ka lynti ba ki nong Dkhiah West ki ïaid kjat kadei ka lynti ban poi sha ka shnong Borghat, kaba na kane ka shnong lah poi sha Muktapur, Sylhet bad Jaintiapur.

Kadei ka lynti leit ïew, lynti thma, lynti Syiem ki nong Sutnga bad baroh ka hima ban poi sha ka ïew Borghat, ïew Sylhet bad ruh sha jaka shong ki syiem ha Jaintiapur.

Ka Shnong Borghat kadei ka shnong, ka don ka khana u barim kaba dei ka kad khaii lyngba ka wah Myntdu (Tisang) jong u syiem Jaiñtia sha ri thor Bangaldesh. Ki jingbut jingsat u barim ha kane ka thain naduh ka temple Borkhat, Kamsing ki dang don sah haduh mynta.

Haka shnong Borkhat ka don ka jaka kñia jong ki syiem kaba dang ïeng sakhi haduh mynta mynne. Kiba bun ki jingthoh shaphang kane ka shnong ki don bad la pule ha ki skul.

Ha katei ka jingïaid kjat baroh ki nongïa shim bynta ki pynpaw ka jingkmen ban ïoh ïaid kjat lyngba ki lynti ïaid jong ki syiem, ki shipai bad baroh ki heh ki san u barim bad ki dak ba paw haki lynti kidei ki dak kiba ki barim ki la ïaid lyngba naka bynta ka Ri pnar.

Ki nongïa shim bynta ki kynthup ïaki Doktor, Engineer, ki nonghikai kolej, ki samla bad ki khynnah kiba hapoh 15 snem. Kiba la rangbah ki kynthup ïa u Giren Swer (78 snem), u Muni Swer (76), u Keydras Sympli (75), u Kwirland Tlang (62). Ka Kong Pershia Phawa bad ka Kong Syrpailin Phawa kidei arngut ki longkmie, Dr Ryngkat Phawa bad Dr. Shwameki Phawa kidei ki arngut pat ki doktor ba la ïashim bynta.

Kum ban shuh pynkynmaw ha u snem 2017 ki nong Dkhiah West ki la ïaid kjat ïaka lynti u barim na Dkhiah West sha Jowai.