Iaid paidbah bad rah lama iong ki saw shnong bad ka EJNC ban dawa surok ha Khliehriat

Syllad | The Rising MeghalayaSeptember 16, 2021

Ka East Jaintia National Council (EJNC) ha ryngkat ki saw tylli ki shnong ba kynthup iaka Pala, Kseh, Muknor bad Khahnar kiba hap hapoh ka Saipung Block, East Jaintia Hills District kila mih paidbah sha surok ban rah iaki lama iong ban dawa na ka sorkar ban shna iaka surok kaba pyniasoh ia kine ki shnong kaba la iehshrah mynta la bun bun snem.

Kane ka jingiaid paidbah ha ryngkat ka jingrah lama iong kala sdang naduh na Lad-Sutnga haduh ha DC ophis Khliehriat haka sngi Balang.

Ha kane ka jingïaid paidbah la wan iashim bynta da ki spah ngut ki nongshong shnong na ki saw tylli ki shnong ryngkat ka EJNC. Kila pynrem ïaka sorkar MDA bad dawa ban pynioh iaka surok ba bha ha kitei ki shnong.

Hadien ka jingïaid paidbah la pynlong ka jingïalang lyngkot ha kaba baroh ki nongkren naduh ki Waheh Shnong jong kitei ki saw shnong bad ki dkhot ka EJNC kila pynpaw ka iaka jingbitar halor ka shah iehbein katei ka surok khlem shna mynta la 15 snem.

Ha kane ka juh ka sngi ka EJNC ryngkat ki nongialam shnong kila ai iaka dorkhat sha u myntri rangbah lyngba u Deputy Commissioner ban dawa ban shna mardor ia katei ka surok kaba pyniasoh iaki tei ki shnong ha katei ka thain.