Iaid paidbah ki khynnah skul ban dawa jingbishar ba hok iaka khynnah ba shah pyniap bad shah lehbeijot ha Sohkymphor

Syllad | The Rising MeghalayaDecember 18, 2020

Ki Khynnah skul bad ki paidbah kiba la bitar halor ka jingshah pyniap bad shah lehbeijot kawei ka khynnah skul kila mih paidbah ban iaid rally haka shnong Sohkymphor, East Jaintia Hills ban pyrshah bad pynrem jur ia kane ka kam sang bad ban dawa na ka bor jong ka aiñ ban pynioh jingbishar ba hok ia kane ka khynnah haka sngi Thohdieng.

Kane ka khynnah skul kaba shah pyniap bad shah lehbeijot kadei ka khynnah kaba dang pule haka kyrdan klas IX ha Tia Chaphrang Higher Secondary School, Sohkymphor.

Kane ka jingjia pyrshah ia kane ka khynnah kala jia haka 16 tarik bad la lap iaka metiap jong ka haka step 17 tarik une u bnai haka lynti khlaw da ki paidbah ba iaid lynti.

Kane ka khynnah kaba dei ka khunswet ka sah bad ka meiduh jong ka khampajih na ki jaka ba bun ki iing briew haka shnong Sohkymphor, kaba hap hapoh ka Khliehriat Police Station.

Ha kane ka jingiaid paidbah ki khynnah skul kiba da ki spah ngut kila mih sha suok ha ryngkat ki jingthoh pynrem bad ban dawa phasi ia ki runar kiba donkti ban pyniap bad lehbeijot ia kane ka khynnah.

Hashuwa ban iaid paidbah la don ka jingialang ha skul Tia Chaphrang kaba iadonlang ki nongialam shnong, ki nonghikai skul, ki sengbhalang ba kynthup iakia KSU Sohkymphor Unit, AJYWO, HNYF bad kiwei kiwei.

Baroh ki nongkren kila kyntu iaka bor jong ka aiñ ban thwet bad kem mardor ia ki runar kiba donkti bad ban pynshitom iaki katkum ka kyndon jong ka aiñ.

Ia kane ka jingialang la pyniaid da u ma Protasius Suiam, Chairman Tia Chaphrang Educational Management Society haka jingiadonlang u heamaster ka skul u Ernest Shadap, ki kmie ki kpa jong ki khynnah skul, u president VDP u Cheilang Lyngdoh, u Rimiki Lyngdoh president KSU Sohkymphor, Heatermon Ryngkhlem president AJYWO East Jaintia Zone, Marlistar Lyngdoh, president HNYF bad kiwei kiwei.