Iaid sahuh ki trok kit dewiong sha Assam, maham kem ka JAC Dong Namchiang ba jot ka surok NH 6

Syllad | The Rising MeghalayaDecember 31, 2024

Ka Joint Action Committee Dong Namchiang, kala pynpaw ka jingsngewkhia kaba jur halor ka jingkit palat pud ne overload ki kali kit dewiong kiba iaid lyngba iaka surok bah National Highway-6 ha East Jaintia Hills District.

Ka JAC Dong Namchiang ha u kyrwoh ba kala phah, kala kynnoh ba kane ka jingleh jong ki trok kit dewiong ka pynlong iaka surok ban nangjot nangjulor nalor ba la dep julor lypa.

Ka JAC kala ong ba ka jingleh jong kine ki truck ka long na ka daw ka jingsynjor ka ain bad ym don shu ki ban peit ia ki nongleh beain halor ka jingkit palat pud jong ki truck kit dewiong.

Shuh shuh ka JAC kala ong ruh ba kam don kano kano ka bishni ia ka kamai kamjih jong kino kino ki briew, hynrei kane ka jingkit palat pud, ka buh jingma ia ki nongleit nongwan na ka por sha ka por bad ka JAC kam don kano kano ka jingpyrshah lada ki kit kumba dei ban kit ne level body.

Kala kyntu jur ruh iaka sorkar ban shim khia ia kane ka jingkit beain jong ki truck kit dewiong, khnang ban lait na ka jingma jingmynsaw ne ka jingjia ba sngewsih, lada kine ki truck kiba kit palat pud kin kylla ha kano kano ka por bad maham ruh ba lada ka sorkar kam shimkhia halor ka jingkit palat pud, ka JAC kan mih paitbah ban kem naphang katba lap bad aiti sha ki bor jong ka ain.