Iaid shait shait ka jingpynkhreh ia ka Lympung ki Khynnah Seng Khasi Seinraij ha Nongkynrih

Syllad | The Rising MeghalayaJanuary 18, 2024

Ka aiom lehkmen ki hep barit ne ka lympung ki khynnah Seng Khasi Seinraij kaba Khatphra (18) ka ban long haka 20 tarik bad 21 tarik Kyllalyngkot haka shnong Nongkynrih, West Jaintia Hills District, la sakhi ba ka jingpynkhreh ka la iaid shait shait.

Ia kane ka lympung ki khynnah la pynlong ryngkat Seinraij Nongkynrih, Laskein Pyllun, West Jaintia Hills District ha madan Seij Kynden Nongkynrih Laskein Pyllun halor ka phang pdeng “Hala Thymmei Ngin Tei Ia La Lawei”

Kane ka shnong ka jngai kumba 90 Kilometre na Shillong bad ka lynti iaid kadei na Jowai, Phramer, Shangpung bad Raliang.

U Dolloi ka Elaka Jowai Ma Puramon Kynjing uba dei ruh u President ka lympung ki Khynnah Seng Khasi Seinraij haba kren sha ki lad pathai khubor ula ong ka jingthmu jong kane ka lympung ka long ban pynsngewkmen pynsngewbha iaki khynnah bad ruh ban pynshlur iaki ban pynpaw pyrthei iaka sap rwai sap shad ba ki don.

Ula ong kane ka aiom lehkmen ki khynnah ka sdang naduh ka 12 tarik Nohprah 2023 bad kan kut haka 21 tarik Kyllalyngkot 2024 da ka jingwan iashim bynta ki 22 tylli ki tnat Circle jong ka Lympung ki Khynnah Seng Khasi Seinraij ba don hapoh ka Bri u Hynñiewtrep Hynniewskum.

Ula iathuh ba haka sngi pynkut kan don ka jingpynkup burom bad sam khusnam sha baroh ki khynnah kiba iashim bynta haki jingiakop bapher bapher kum ka jingiakop pyni riam tynrai, ki jingiakop ialehkai tynrai kum ka dat mawpoin, ka jingsiat khnam bad kiwei kiwei ki jait jingiakop.

Ha kaba iadei bad ka lynti synkieng, u Dolloi ula kyrpad ia baroh ki nongwan sha ka lympung ban ym iaknieh iaid shwa namar ka surok kaba khlad na Raliang ban poi shaka Shnong Nongkynrih kadei ka surok kaba khim kaba ki kali ki hap ban iaid da kaba bud da u lain khnang ba ki nongwan sha ka lympung kin lait ban duh bhah duh bynta lang.

Ula kyrpad ruh ia kito kiba shim bynta haka lympung ban wan sahmiet lypa, khnang ban lait na kano kano ka jingsahkut blok ne slem shaka lympung bad la kyrpad ruh ia baroh ban ym bret pathar iaki plastic ne ki song jingbam kiba pynjakhlia iaki lynti synkieng.

U Waheh Shnong Nongkynrih u Ma Kamailang Tyngkan uba dei ruh u President Seinraij Nongkynrih Laskein Pyllun, ula pynpaw ka jingkmen iaka jinglah ban pynlong iaka lympung ki khynnah hapoh ka Shnong Nongkynrih. U khmih lynti ruh ba baroh ki nongwan sha ka lympung kin poi da ka jingsuk jingsain khnang ba kane ka lympung ki khynnah kan long kaba phuh iphieng bad shonkun shongkhia.

Ha kaba iadei bad rukom pynieng kali, ula ong namar ba kadei ka surok kaba khim kumta la kyrpad ia baroh ki nongwan na ka thain Raliang ban pynieng kali hapoh ka madan phutbol Madankynsaw bad ha madan ba la pynkhreh hapoh ka Shnong Nongkynrih, bad ia kiba wan na ka thain Shilliang Myntang kum ka Saphai, Sahsniang, Mukroh, Saba la pynkhreh iaka jaka pynieng kali ha Umpung kaba don sharum ka Shnong Nongkynrih.