Iaid shait shait ka jingpynkhreh iaka Lympung ki Khynnah Seng Khasi Seinraij ha Pynursla

Syllad | The Rising MeghalayaJanuary 16, 2025

Ka aiom lehkmen ki hep barit ne ka Lympung Ki Khynnah Seng Khasi Seinraij kaba 19 kan long haka 18 tarik bad 19 tarik Kyllalyngkot ha Pynursla, East Khasi Hills bad la sakhi ba ka jingpynkhreh kala iaid shait shait shakhmat.

Haka 15 tarik Kyllalyngkot hapoh ka jingialam u President Seng bad Dolloi ka Elaka Jowai Ma Puramon Kynjing ryngkat u General Secretary ka Seng Khasi Riwar Mihngi Bah Robarlin Suting kila leit jngoh iaka jingpynkhreh pynkhrum na ka bynta kane ka lympung.

U Ma Puramon Kynjing ula kyntu iaki baroh ki nongiashim bynta ban wan biang por sha ka lympung bad ban kiar na ka jingbret pathar iaki jaboh jabain kum ki song jingbam khamtam ki plastic namar ka pynsniew dur iaka mei mariang.

Ula iathuh ruh ba ia kane ka lympung yn pyniaid hi da ki khynnah nalor ki jingshad bad ka jingpyni iala ki sap ki phong bad ula kitbok kitrwiang ia baroh ki khynnah kumjuh iaka Seng Khasi Riwar Mihngi Pyllung kaba la shim iaka jingkit khlieh ban pdiang ia kane ka lympung.

U Bah Robarlin Suting General Secretary ka Seng Khasi Riwar Mihngi ula pyntip ba ka 17 tarik kan dei ka sngi kaba kyrpang namar ki khynnah kin wan ban ai jinghikai iaki khynnah.

Ula aikhublei iaki tnad sorkar naduh ka PWD, PHE, MeECL nalor kiwei kiba la trei shitom ban pynbit pynbiang halor ki jingdonkam ha kane ka lympung.

U nongaibuit ka Seng Khasi Riwar Mihngi, u Bah Control Marbaniang ula khot wer ia baroh ki ban wan iashim bynta sha kane ka lympung ban ioh iaka jinghikai kaba paka bad kitbok kitrwiang ba kane ka lympung kan long kaba phuh ba phieng.