Ïaid shait shait ka pynkhreh ïaka Jingïaseng Synod ha Barato | Pule ïa ki jingpynbeit ka Balang

Syllad | The Rising MeghalayaMarch 8, 2022

Ka jingpynkhreh iaka Jingïaseng Synod jong ka KJP Synod Mihngi kaban long haka Balang Presbyterian Barato, kaba hap haka Mynso Presbytery kala ïaid shait shait, wat la na kaliang ka sorkar ka kham suki ban pynioh iaki lad jingiarap.

Kane ka Jingïaseng Synod kan long naduh ka 17 tarik haduh 20 tarik Lber 2022.

Nakaliang ka Balang kala long kaba pynkhreh ban pynlong iaka Jingseng Synod kaba kala dei ban pdiang naduh u snem 2021, hynrei namar ka jingwan lynsher ka khlam COVID-19 la hap ban pynsngeh ia baroh ki jingiaseng kiba ialum paidbah.

U Pastor DH. Lamare incharge Balang Barato Presbyterian ula ong ba kum ka balang ngi ka kwah ban ai ka khubor kaba kyrpang sha baroh ki paid riewngeit ba kim dei ban khuslai haka jingïadei bad kano kano ka bynta namarba ka balang katba lah ka bor ka la pyrshang ban pynbit pynbiang ïaki jingdonkam khamtam haka jingïadei bad ka jimgdonkam jong ka met haka liang ka bam ka dih.

Ha kaba ïadei bad ka rukom shong jong ki nongwan sha ka jingïaseng Synod ula kyrpad ïaki riewngeit ban pynkhreh la ki jong ki jong ki jingsiang namarba ka madan pynlong jingïaseng kam dei ka madan phlang hynrei kadei ka madan khyndew lehse kaba shitom ban shong lada ym don ki jaiñ jingsiang.

“Ka balang ka la pynkhreh ïaki shuki ban shong ki nongwan shaka jingïaseng hynrei yn nym lah pat ban pynbit pynbiang ïa baroh,” la ong u pastor Lamare.

Ka jingpynbeit ban iaid ki kali ba wan jingiaseng:

Haba ïadei bad ka jaka pynïeng kali ula ong, ka balang ka la pynkhreh ïaki jaka pynïeng kali kiba long hajan jong ka madan pynlong jingïaseng bad kiba kwah ban pynïeng kali hajan ka madan kidei ban poi hapoh ka por 10.00 baje mynstep.

Haba ïadei bad ka surok ban poi ki kali, ula ong, kumba long mynta ki don sawtylli ki surok kiba pynïasoh ïaka shnong Barato.

Kawei ka surok kaba long ka surok ïa kiba wan na ka thaiñ Shillong kin rung ïaka Lad Ummulong sha Nartiang bad kin poi sha Samatan haduh Barato.

Kiba wan na ka thaiñ War Jaintia kumjuh Jowai kin rung ïaka surok na Lad Pasyih, Mynsoo, Samatan shaduh Barato.

Na ka bynta kiba wan na ka thaiñ East Jaintia kin rung ïaka surok na Phramer, Shangpung, Raliang shaduh Barato.

Nangta kiba wan na ka thaiñ Ïooksi, Saphai kin rung na ka lynti Sahsniang, Mooshrot, Saba bad kin poi sha Barato bad na bynta kiba wan na ka thaiñ Mynsngat-Khanduli kin ïaid na Lad Namdong, Sanaro shaduh Barato.

La kyrpad ïaki nongñiah kali ba kin sngewbha ban burom bad kongnguh ïaki nong pynïaid kali (Traffic) bad ki Volunteer kiba la buh ha la ki jaka-jaka ban pynïeng kali ha kaba kane kan long na ka bynta ka jingbit jingbiang jong baroh ki nongwan jingïaseng ban nym buh jingeh ïaki nongwan sha ka jingïaseng.

Naka bynta ban ishongkun ka jingshakri Blei, u Pastor ula ong ba ka Balang ka la rai ba ym nym shah ïaki nongwan die jingdie khamtam haka sngi U Trai.

Hapdeng ka jingpynkhreh kaba lyngkot jong ka por, ka balang ka la pynpaw ïaka jingsngewdiaw namar ba haduh mynta ka jinglong jingman ki surok kumjuh ki lynti synkieng ban leit sha katei ka jaka ba la pynkhreh ïaka Synod kam long kaba bit ba biang.

Naduh ba sdang ka jingpynkhreh ki nongïalam balang ki la leit ïakynduh ïaki bor sorkar hynrei namar ka khlam jingpang ka pynthut noh ïa kiba bun ki kam ki jam kiba ïadei bad ki surok kumjuh ki lynti synkieng hynrei ngi la pyrshang pat ban kyrpad ïaka sorkar wat lada kam lah ban ai da kaba surok kaba bha ruh, lehse ki thliew ki syar kan pyndap khnang ban pynsuk ïaki nongwan sha ka Synod.

Haba ïadei bad ka surok pohshnong ne Internal road ula ïathuh ba na ka liang ka sorkar ka la ïarap kumba 1 KM tam eiei ka surok rong te namar ba kadei kaba shnong kaba heh kaba don kumba 900 tylli ki thliew ïing, tang 1KM kam pat lah ban weng ïaki jingeh haba ïadei bad ki surok.

Haba ïadei bad ka umbam umdih, ula ong ki nongïalam balang ki la pyrshang ban ïakynduh ïaki bor ba halor bad ki la kular ban pynbit pynbiang na bynta ka um, haoid ki don katto katne ki longïing kim pat ïoh ïaka um kumba ka sorkar ka kwah ban pynïoh umbam umdih ha baroh ki thliew ïing lyngba ka skhim Jal Jeevan Mission (JJM) namar ka shnong ka la heh bad ka skhim kadei kaba rit haba ïanujor bad kiwei ki shnong.