Iaid shakhmat ka jingpynkhreh ka BJP Meghalaya ia ka election Lok Sabha, shen yn pynbna ia ki kyrtong 

Syllad | The Rising MeghalayaNovember 28, 2023

U President ka BJP Meghalaya u Rikman G Momin haka sngi Nyngkong u la ong ba ka Seng BJP kala ka la iaid shakhmat ha kaba iadei bad ka jingpynkhreh na ka bynta ka election MP Lok Sabha ha ka jylla bad shen kan sa pynbna ia ki kyrtong ki jong ka ki ban ia aireng napoh Shillong bad Tura Parliamentary Constituency.

Haba kren sha ki lad pathai khubor u Rikman u la ong ruh ba ki la don katto katne ki kyrtong kiba la wan sha ka Seng ban pan tiket ban iakhun ha kane ka ilekshon Lok Sabha ka ban long ha une u snem u ban wan hynrei ia kaba um pat lah ban pyntip ia ki kyrteng jong ki bad ia kaba yn sa pynbna da ka BJP napoh Central.

U Momin u la ong ruh ba u Myntri sorkar u Bah AL Hek ruh u la pynpaw ia ka jingdon mon ban iakhun ha kane ka election ka ban wan napoh Shillong parliamentary seat, hynrei kane ruh ka shong ha ki nongialam napoh Central bad ba ka kamram ka jong u hi ka long ban phah ia ki kyrteng jong kiba kwah ban ia aireng. Nalor kata u la ong ba ka party ka pdiang sngewbha ruh ia kino kino ki kyrtong kynthei kiba kwah ban aplai tiket.

“Na ka bynta ka BJP ka long kaba bha shibun lada ka lah ban pynieng kyrtong da ki kynthei namar dang shen la pyntreikam ia ka jngbhah kyrpang kaba 33% ia ki kynthei ” ong u Momin.

Ha kajuh ka por une u nongialam ka BJP ula kyntait ban kren eiei halor ka rukom treikam  u MP mynta na Shillong u Bah Vincent H Pala uba dei na ka seng Congress, hynrei ula pynpaw pat ia ka jingbym hun ia ka rukom treikam jong ka MP ka NPP na Tura ka Agatha K Sangma.

“Ia mynta hi, ngam don jingtip eiei ia ka rukom treikam jong ka (Agatha). Ngam tharai ba kala leh ia kano kano ka kam kaba bha namar ki paidbah ki dei ban ioh pdiang ia ki skhim na ka sorkar pdeng hynrei kam shym la leh ei ei na ka bynta ki paidbah” ula ong.

Ha kawei pat ka bynta ka Seng BJP Meghalaya ka la pynbna ia ki kyrteng jong ki nongkitkam jong ka kaba kynthup ia hynriew ngut ki state vice presidents kiba kynthup ia u Bernard N Marak, Khrawboklang Basaiawmoit, Wankitbok Pohshna, Dipul R Marak, Gagan Jain, Riya Sangma, 2 ngut ki state general secretary kiba kynthup ia u Bah  Evarist Myrsing bad u Lakhon Biam, 6 ki state secretary kiba kynthup ia u Hakabiang Lyngdoh, Bernadette Lyngdoh, Adamkid Sangma, Brivia Thabah, Premananda Koch bad u Bipen Pradhan, treasurer Sarwan Jhunjhunwala, office secretary Arunadhati Paul, state president ka Mahila Morcha Kong  Sukhi Pariat, state president Yuva Morcha Mewakar Lyngdoh, State president  ST Morcha  u Thomas N Marak, state president Kisan Morcha  Ralden Bryan Shabong bad state president Minority Morcha Shahidur Rahman.