Iaid shakhmat ka jingtei thymmai iaka Jawaharlal Nehru Stadium, shen yn siang phlang plastic sa ka madan First Ground

Syllad | The Rising MeghalayaMarch 24, 2022

U Bah Banteidor Lyngdoh, Myntri ba dei khmih ia ka tnat Sports & Youth Affairs ka sorkar jylla haka sngi Balang da lade u la hiar ban jurip bad khmih da la ki jong ki khmat haba iadei bad ka jingsdang jong ka kam ba iadei bad ka jingmaramot bad tei thymmai ia ka Jawaharlal Nehru Sports Complex, Polo, Shillong

Kane ka jingjurip da u bah Banteidor, ka long kum shi bynta ban buddien ia ka kam, kaba ka sorkar ka la buh ia ka thong ba la kumno kumno, ia kane ka kam donkam ban pyndep hapoh u bnai Risaw mynta u snem.

La synralang ia u bah Banteidor ha kane ka jingjurip dei u working president Meghalaya State Olympic Association u bah John F Kharshiing, General Secretary bah Finely L Pariat, u Chief Engineer State Sports Council u bah Bibatdor M Syiem, u bah Paia War Nongbri Asst. Director Sports & Youth Affairs.

U bah Banteidor haba jubab iaka jingkylli ba suki ka jingtei aika madan, ula pynskan da kaba ong ba ka kam hi kam shym suki kaba long tang hadien I khyndiat por ba la khreh sdang ia ka kam.

U Myntri ula bynrap ba ka jingtei ha kane ka kynti kaba mynta kan kham pher namar structure ka jong ka dei da ka prefab bad pre-engineering ne kiba la dep lypa, hynrei wat la katta ruh u bah Banteidor u ong ba u la khot lang ia baroh naduh u Chief Engineer nangta ia u contractor ban ioh ban iakren bad ban sngewthuh ia ka jingbhah ne mang por  kat kum ba la pruid dak a ka sorkar jylla.

Haba batai kham bniah ia ki jingtei kiba la khreh ban jam shakhmat ha kane ka kut jong kane ka madan, u bah Banteidor, u iathuh ba nalor ka jingkhreh ban shna pynthymmai ia ka madan football, marjan jong kane ka madan katta ka madan Fifth ground ka jingtei kan dei ia ka indoor sports complex, ban bynrap lang wat ia ka pung jngi ne swimming pool bad bynrap biang sa kawei ka indoor stadium ban pynbha bad pynitynnad ia baroh ki sawdong sawkun jong kane ka jaka.

Ha kaba iadei pat bad ka jingkhreh siang ia u artificial turf ia ka madan First Ground ka Shillong Sports Association ka long namar ba ka kam  ophis kam dei ka kam kaba lada ong mynta, mynta hi yn lah ban ioh noh, hynrei u la ong ba hap ban iaid thik pa thik khnang ban ioh ia ka bhah pisa ne sanction.

Ula iathuh ba ka kam jong kane la dep ban pyniaid shakhmat, ia kaba la dep ruh ban pynbiang ia ka jinglut jingsep ne estimate bad u kyrmen ba ka kam hi kan nym slem shuh naka bynta ban khreh ban khot tender noh khnang ban ioh ban sdang ia ka kam.

Haba phai sha madan Second Ground bad bynta ba don mar pyrshah ka rud jong ka Wahumkhrah, ha kaba u la ong ba um kwah ba kan long kumba ka long mynta ha kaba shilliang don ki gallery katba sha shilliang ym don eiei.

Pynban haba iadei bad ki lympung ialehkai, kumba ka long ia mynta ka Shillong Sports Association, naduh bala kham hiar ka jingpang iabit khniang jingpang COVID-19, ka la lah ha kaban pynlong ne wat ban pyndrp ia kiba bun ki lympung ialehkai kum ka 4th Division, 3rd Division, nangta ka 2nd division bad mynta ka la pynkhreh ban pynlong ia ka 1st division bad kumjuh ia ka lympung ialehkai football ki kynthei, ka SSA ka sah pat ha kaban pynlong ia ka lympung ialehkai bna nam ha ka jylla ka Shillong Premier League ne ka SPL.

Halor jong kane, u bah Banteidor u pynpaw ba ka kam hi kumba ka long kadei ba la mang lang naka bynta baroh ar katta ka madan bad gallery, kaba tang hadien ba la khot iaka tender, u contractor uba ioh ia ka kam, mardor un hap ban sdang noh shwa ban siang artificial turf ia ka madan bad ia ka gallery shong ki paidbah lah ban pyndep pat ia ka kham hadien.