Iaineh ka UDP bad ka Sorkar MDA ban pyllait na ka President Rule

Syllad | The Rising MeghalayaMay 29, 2022

Ka United Democratic Party (UDP) kan dang iaineh bad ka Sorkar Meghalaya Democratic Alliance (MDA) wat hapdeng ki kynrum kynram kiba bun ban iada ia ka jylla na ka jingsynshar President Rule, phla u General Secretary ka UDP u Dr Jemino Mawthoh.

U la ong shuh shuh lada ka UDP ka weng ialade na ka Sorkar MDA khlem pep ka Sorkar kan sa khyllem noh bad lada khyllem kan sa wan ka President Rule bad ki paidbah ki sa pynkit pap ia ka UDP.

U MLA barim ka Nongthymmai Constituency haba kren shuh shuh haka jingialang pynskhem nongkitkam ka party UDP Jowai Circle ha iungwalieh ka Dorbar Shnong Dulong, Jowai haka sngi Saitjain, u la ong ba ha ka party UDP kiba bun bah ki nongialam kiba la iaineh ha ka party da ki phew snem bad ki don ki nongialam jong kiwei ki party kiba phet na kawei ka seng sha kawei seng. U la ong ruh ba “ki don ki nongialam kiba thmu rung noh sha ka UDP bad ia kum kita ki nongialam ngi ong ba ki la kylla ba mut noh.”

U General Secretary ka UDP u la iathuh ba “nga la iakren bad u President Rangbah ka seng u Bah Metbah Lyngdoh ba ngi dei ban khmih sani bha ia kum kino ki MLA ngin pdiang sha ka party bad ngin hap pyrkhat hato yn jied ia ki MLA ba heh spah ne ia ki MLA badon jingkitkhlieh.”

Halor ki kynrum kynram haba iadei bad ka Memorandum of Understanding kaba la iasoi ban pynbeit ia ki hynriew tylli ki jaka iakajia bad ka Assam ha ka First Phase, u Chairman barim jong ka Synjuk Ki Seng Samla Shnong u la kyntu ia ka Sorkar MDA ban dei ban khmih biang sa shisien ia katei ka MoU khnang pynsuk ia ki briew kiba la shah ktah na kane ka MoU.

U MLA jong ka Mowkaiaw Constituency u Ma Nujorki Sungoh u la thalain tyngeh ia u MLA jong ka Jowai Constituency u Ma Wailadmiki Shylla kum u MLA bym larkam namar kam shym la don kano kano ka roi ka par ha ka constituency Jowai ha kine ki saw snem bala leit.

U la kynthoh jur halor ka jingpyrshang pynbieit ban pynkylla noh ia ka ophis DC Jowai kum ka shopping mall, katba ia ka Iawmusiang Shopping Complex ym shym la pyndep satia haduh mynta.

Also Read | Ka UDP ka thei bha briew ha Jowai ka khring ia kiba bun ban ioh iaka ong u Moonlight Pariat

“Ka jingtei iaka Iawmuisang kam dei ka jingtei World Trade Center, hynrei balei ka shimpor haduh katne katne ban tei pyndep iaka Iawmusiang,” la ong u Ma Nujorki.

Une Nongialam barim jong ka Jaintia Students Union (JSU) u la pynpaw ia ka jingsngewkhia kaba khraw halor ka jingkynnoh jong ki nongialam jong ka NPP ia ki paidbah halor ka jingbym lah jong ki ban pynbeit ia ka ka jaka pyllang ñiut ha Jowai.

U Myntri ka tnat Revenue u Ma Kyrmen Shylla u la kyntu ia ki nongkitkam bad nongkyrshan jong ka party ba kin trei shitom khnang ba kin ioh wanrah biang sa shisien ia ka histori jong u snem 1998 ha u snem 2023 haba ka UDP ka la jop na baroh 7 tylli ki constituency ha Ri Lum Jaintia.

Haba iaroh ia u Ma Moonlight Pariat uba la iai ialeh ia ka elekshon MLA ha lai sien, u MLA ka Khliehriat u la ong ba ka dei ka jingieit jong u Ma Moonlight ia ka Constituency Jowai ba u la rai ban iakhun biang mynta ka sien ha u snem 2023 bad khlem pep ha ka sien kaba saw yn sa ioh ia ka jingjop kaba don burom.

U la ong ba ka UDP ka pdiang ia baroh ban wan pan tiket ban iakhun elekshon na ki constituency bapher bapher, hynrei u la ban jur ba da lei lei ruh yn nym lah ban thied ia ka tiket iakhun elekshon ha UDP namar ka party ka iaid katkum ki riti treikam jong ka.

U Chief Advisor jong ka UDP u Bah Bindo M Lanong u la ong ba baroh shi katta la synshar ia ka jylla Meghalaya na ka phang sepsngi jong ka Meghalaya ne ka West Meghalaya bad mynta ka kynti ha u snem 2023 ka la dei ka por ban synshar noh na ka phang jong ka mihngi jong ka Meghalaya ne ka East Meghalaya.

U la kynthoh jur ia ka Sorkar BJP ha ka jingialam jong u Prime Minister Modi kaba thmu ban pynrung da ka ia ka jinghikai ia ka Hindi haduh Matric ha Jylla, katba ialade u dang shah hikai ban kren phareng. Shuh shuh u la ong ba ka BJP ka thmu ban pyniaid ia ka lynti rel na Shillong sha Jaintia Hills sha Mizoram bad kine ki long kiei kiei ki buit sainti kiba ma ia ka jylla Meghalaya.

U Deputy Chief Minister barim jong ka Jylla ula pynbna ba yn iakhun ia ka Elekshon MLA na ka constituency Nongkrem bad mynta yn hap ban ai reng ia ka spah ka phew jong u Minister ka tnat Transport u Ma Dasakhaitbha Lamare uba la phet noh na ka constituency Mawhati sha Nongkrem.

Kiwei kiwei kiba la ai jingkren ki kynthup ia u Advisor jong ka UDP Youth Wing bad MLA barim jong ka Mawlai constituency u Bah Embhah Syiemlieh, u Deputy Chief Executive Member ka JHADC u Bah Lasky Rymbai, u Vice President ka UDP U Bah Allantry Dkhar, U President ka UDP West Jaintia Hills u Bah Moonlight Pariat, Wining Garland Sungoh haka jingialang kaba pyniaid da u Kitbok Nongtdu president UDP Jowai Circle.