Ïaitreilang ban jop iaka jingsniew ha kine ki sngi: Pastor Marsing haba kren haka Jingiaseng Synod Barato

Syllad | The Rising MeghalayaMarch 21, 2022

Ka jingïatreilang ka don ka jingduna eh ha kine ki sngi mynta ha ki katto katne ki jaka, ka mih ka jingbishni jingpihuiñ, ka don ka mynsiem ñiew shilliang khmat, ki nongialam ia kiba shah ialam, ka jingbym kohnguh bad ka jingbym shah synshar la ka long haki ïing ki sem, la haki  balang, ki shnong ki thaw bad haka synshar khadar.

Ïa kane la kren da u Rev WP Marsing haka Jingïaseng Synod Rangbah jong ka Khasi Jaiñtia Presbyterian Synod Mihngi kaba 20 kaba la long haka Balang Presbyterian Barato. La wan tuid da ki hajar ki riewngeit jong ka Balang Presbyterian kiba hap hapoh ka KJP Synod Mihngi.

Ka Subject Synod kalong “To beh brai ïaka jinglong suk bad ki briew baroh”(Thessaloni.5.15).

U Rev WP Marsing ula kren shaphang U Diengduh da kaba pynshong nongrim katkum ka kitab Eksodos lynnong kaba 4 dkhot kaba 21 (Bad u Moses ula shim ïala ka tnga bad ïala ki khun shynrang bad ula buh ïaki halor ka Kada ula leit phai sha ri Ijipt bad u Moses ula shim ïa u ‘Diengduh’ jong U Blei).

Ka kitab Eksodos, ka ïathuh ïaka jingshah ring mraw ki Israel 40 snem bad ka jingpyllait ïaki na ka ri Ijipt ban leit shaka ri Kanan ka ri kaba tuid da ka dud bad ka ngap, ka jingïaid ki Israel naduh ka duriaw basaw haduh u lum Sinai bad ki la poi ha u lum Sinai ha kaba ki la ïoh iaki 10 tylli ki hukum.

Hapdeng ka jingkordit, ki Israel ki  lynñiar ha U Blei bad U Blei ula pynmih ïa u Moses ban ïarap ban pyllait na kane ka lanot bad U Blei ula kular ban don lem ryngkat bad u Moses da kaba u ong to shim ïa une u Diengduh uba la pynkyntang bad ïalam ïaki Israel na ka ri ka Ijipt shaka ri Kanan. U Moses ula shim ïa u Diengduh jong U Blei bad ula leit sha ri Ijipt da ka jingshlur ban pynpaw ïaki kam bah hakhmat u Pharo.

U Diengduh jong u Moses ula kylla long u Diengduh jong U Blei uba long ka pdeng jong ki kambah. U Diengduh u plie ïaka bynta ban ïaid, u Diengduh jong U Blei u kyrshan ban ïaid, u Diengduh jong U Blei u pynmih ïaki um ba bang ban dih bad u Diengduh jong U Blei u ai ïaka jingjop thma.

U Rev Marsing ula kyntu ïaki para bangeit ban long kiba ïatreilang ka jingïatylli bad ka jinglong kawei khnang ban lah ban jop ïaki jingsniew kiba bun jait ha kine ki sngi kiba mynta.

Ki Balang, ki District, ki Presbytery, ki Synod bad wat haduh PCI ne Assembly ki don shibun ki kam ban pyndep lada ym don ka jingïatreilang ki sahkut tang haki rai yn nym lah ban pyntreikam ïaki.

U Rev Marsing ula kyntu ïaki para bangeit ban kynmaw ïa U Blei haki por baroh ba un don ryngkat haki lynti ïaid ban lait na ka jingma jingmynsaw bad na ka jingïap ruh bad la kyntu ba ymdei ban sngewsarong haba ïoh ïaka jingkoit jingkhiah ne haba don haka jingsuk jingsaiñ namar ka Ktien U Blei ka maham ïa kata.

Hadien ba la dep ban sam ïaka khubor naka Ktien jong U Blei la ïohsngew ruh ïaki jingrwai Choir na ki Jingiaseng Samla kiba kynthup iaka Balang Presbyterian Moopala, Demthring, Barato bad ka Standing Choir KJP Synod Mihngi.

Hashwa kane haka jingïaseng 10.30 la ïoh ka jingkren na u Rev S. Lamare bad ki jingrwai Choir na ka Jingïaseng Samla balang Presbyterian Mowtyrshiah, Shnongpdeng, Moobakhon bad Standing Choir Mowkaïaw Presbytery haka jingïaseng kaba la pynïaid da u Moderator Rev. S. Lamare.

Ka jingïaseng Synod Rangbah jong ka Khasi Jaiñtia Presbyterian Synod Mihngi kaba 21 kan long haka balang Nangbah haka 16 tarik 17 tarik Lber 2023.