Ïaka JHADC la pynïaid da ka Court, u CEM u dei ban hiar shuki dalade

Syllad | The Rising MeghalayaNovember 28, 2019

JOWAI: “Ka long ka jingjah burom kaba khraw ïaka Executive Committee jong ka Jaiñtia Hills Autonomous District Council (JHADC) kaba ïalam u ma Thombor Shiwat namar ba ha kibun ki khep kala shah pynïaid haka ïing bishar,” la ong u Ma Andrew.

“Naduh ka kam Waheh Shnong ha ka shnong Sohmynting bad Khliehtyrshi, ka ïing bishar kala pynksan ïa u paidbah bad ki hukum jong ka JHADC kila ïap,”la ong u ma Awhai Andrew Shullai MDC jong ka Congress haba kren bad ki nongthoh khubor hadien bala wai ka Dorbar Tlang. Ula ong ba mynta sa ka kam Chairman ruh u kyrmen baka court kan ai ka jingbishar kaba hok khnang ban ieng skhem ki aiñ bad ban pynbha ïaka ka rukom pynïaid kam ka konsil.

Kiba bun ki mukotduma ka JHADC la rai rem ïaka namar ba ka Executive Committee ka long kaba tlot..

Ha kum kane ka por ba ka ioh ka kot jong ka JHADC ka hiran, hynrei ki mar pohkhyndew kum u dewiong u mawshun ki ïaid tuh bad la duh ei ïa ki khajna. Kam don kano kano ka jingkitkhlieh naka EC ban khanglad ïaka khaii tuh ïa u dewiong, ula ong shuh shuh u ma Andrew.

Ha kaba iadei bad ki skhim MDC “Ma ngi kiba don haka liang pyrshah ngim ïoh eiei kynthup naka Special Assistance Grant (SAG) kaba ka sorkar kmie kala ai jingïarap ban theh ki kam pynroi sha baroh ki constituency,” la ong ma Andrew.

“Mynta kala poi ka samoi Khristmas, ka jingsiew bai skul ïaki khun ki kti kala poi kaba ktah bha ïaka jinglut jingsep, hynrei kane ka EC kaba ïalam u Ma Thombor kam shym la shimkhia eiei ban peit ïaka bha ka miat jong ki nontrei,” la ong u ma Lakhon bad bynrap ba ki nongtrei ka konsil kila ai da ka dorkhat sha u CEM ban dawa pynioh tulop kaba 6 bnai, arrear jong ka revised pay katkum ka Fifth Pay Commission,” la ong shuh shuh u Ma Lakhon.

“Kane ka EC kadei kaba tlot tam bad kam don mat treikam bad kam don kano kano ka jingshimkhia ban ïakren ïaka iap ka im ka konsil,” ong u Ma Lakhon Biam bad bynrap ba kane ka EC imat kam don pisa shuh ha kaba dei na kane ka daw baka pynïaid bakla wat ïaka pisa SAG ban siew tulop ïaki nongtrei jong ka konsil haduh T.16 Klur.

Halor ka T.16 klur u CEM Ma Thombor ula ong ba kym shym la pynïaid bakla iaka skim SAG bad kim lah ban siew tulop da ka skim SAG namar ba ki han ban buh thik thik ïaki kyndon. .

Ka liang pyrshah kala dawa na u CEM ba un hiar shuki dalade bad ailad ïa kiwei ban ialam ïaka konsil, namar hapoh ka jingilam jong u ka EC committee kala phiel bad kam lah wat tang ban ïakren bad ka sorkar ban khang ïaka jingshalan dewiong beaiñ kaba la pynduh khajna da ki klur iaka konsil.

“Mynta u paidbah ula sah haka umdum namar ba ka konsil kam pyrkhat eiei halor ka jingpynjari iaka aiñ Mine and Minerals (Development and Regulation) Act 1957 ha ka jylla Meghalaya bad kane ka Act kaba buh iaki kyndon kumno ban tih dewiong bad ktah ïaka jinglong trai jaka,” ong u ma Lakhon Biam.