Iakhaid ka 7 Wasa vs. Ladthadlaboh, jop ka Nangbah Mulang haka Super Division WJDSA

Syllad | The Rising MeghalayaNovember 13, 2024

Ka Nangbah Mulang kala bteng ban khur namjop da kaba pynliem iaka Demthring da 2-1 haka jingialehkai Super Division kaba pyniaid da ka West Jaintia District Sports Association (WJDSA) kaba iaid shait shait mynta ha Kiang Nangbah Stadium.

Haba phai sha ka jingialehkai ka ka Nangbah Mulang kala tam shakhmat tang hapoh 2 minit ba la iaid ka jingialehkai lyngba ka kol kaba la thep da u Roland Shylla bad ka kol jop la thep da u Samepaia Ryngki (90+1). Shikol ka Demthring la thep da u Marshial Nongrum (40).

Kane ka namjop ka Nangbah Mulang kala pynlong iaka ban don hakhmat eh haka miej iakhein da kaba kamai 9 point bad ka Demthring 4 point haka kyrdan kaba saw.

Ha kawei pat ka jingialehkai kaba bud ka 7 Wasa kala iakhaid bad ka Ladthadlaboh ha ka jingialehkai kaba khlem don mano mano ba ioh thep kol bad iasam iaka poin mar shipoin.

Ka Ladthadlaboh ka don haka kyrdan kaba ar da kaba kamai 7 point ki lai tylli ki jingialehkai, ka 7 Wasa 5 point.

Haka 15 tarik Naiwieng ka jingialehkai kan long hapdeng ka Mukhla Raij VS Wahiajer haka por 11.00 baje mynstep, ka Demthring VS Sailung Ialong haka por 2.00 baje nohphai sngi.