Iakhaid ka Bataw YWSC vs Lumshken bad ka Tpepswer vs Rymbai Wahshnong haka 1st Div ka EJHDFA

Syllad | The Rising MeghalayaOctober 26, 2024

Ka jingialehkai hapdeng ka Bataw YWSC pyrshah iaka Lumshken kala kut da kaba iakhaid da 2-2, katba Tpepswer SSWO pyrshah iaka Rymbai Wahshnong kala kut da 1-1 haka jingialehkai 1st Division Football Tournament kaba pyniaid da ka East Jaintia Hills District Football Association (EJHDFA) kaba long ha madan artificial turf ha Diengshynrum haka 26 tarik u Risaw.

Ha ka jingialehkai ba nyngkong ka Bataw bad ka Lumshken, ka Lumshken kala wan nadien ban pyniakhaid ia baroh ar tylli ki kol. Ka Bataw kala thep shuwa lyngba Jesper Lamare (38) bad kane ka kol kala neh haduh ba kut ka kylla step.

Dei haka kylla miet ka Lumshken kala ioh ban pynphai lyngba u Baleski Lamo (59), hynrei tang hadien katto katne por ka Bataw kala pyntam biang da shikol lyngba ka kol kaba la thep u Marbud Suchiang (70).

Hadien kane ka kol ka jingiakhun kala nang shongshit kaba ki arliang kila pyrshang ban ioh thep kol bad ha ka minit kaba 82 ka Lumshken kala ioh biang iaka lad ban pyniakhaid lyngba u Kiarbes Lyngdoh u bym shym la pynlehnohei iaka kabu ksiar kaba ula ioh kaba la pynlong iaka jingiakhun ban iakhaid mar 2-2.

Haka jingialehkai kaba bud ruh ka Tpepswer SSWO kala iakhaid mar 1-1 bad ka Rymbai Wahshnong SC.

Na kaliang ka Tpepswer la thep da u Chemi Suchiang (8) bad iaka kol ka Rymbai Wahshnong la thep da u Omebiang Lyngdoh (12). Kine ki kol kila neh haduh ba kut ka jingialehkai.

Haka 29 tarik Risaw ka jingialehkai kan long hapdeng ka Moolamanoh SC bad Rymbai Synrangshahkhain SC haka por 12.00 baje mynsngi. Ka Wahiajer Narpuh YSSC bad Jalyiah UTD SC haka por 2.30 baje nohphai sngi.