Iakhih paidbah sa ka Synjuk Waheh Chnong Jowai ban pynkynriah iaki ñiut kiba la kylla lum ha baroh ki iew

Syllad | The Rising MeghalayaAugust 10, 2021

Ka Synjuk Waheh Chnong Jowai kum shibynta ban pyrshah iaka jingkuman ka sorkar khamtam ka tnad pynroi sor ne ka tnad Urban Affairs ban pynkynriah iaki ñiut na baroh ki iew ha sor Jowai kala mih sha surok ban pynpaw iaka jingpyrshah haka sngi ba Ar.

Kane ka synjuk ki waheh chnong kumba 50 ngut eiei kila rah ryngkat ki placard ban mih sha iew Iawmusiang ban ieng ha khmat ki ñiut kiba la lum thup la bun bun taiew ha Jowai. Ki placard ba ki rah ki don ki jingthoh ban pynkynriah iaki ñiut sha ki jaka ba dei.

“U Chief Minister u kren shaphang ban iada mariang, phewse ha Jowai la syrtap ki ñiut” ki khubor bala thoh ha ki placard.

Kwah thied jaka bret ñiut ka Jowai Municipal Board

Ka bor synshar district West Jaintia HIlls hadien bala phiel ka Jowai Municipal Board ban lum ñiut la bun bun taiew kala pynjari da ka 144 CrPC ha Mynkjai naka daw ka jingpyrshah ki 6 shnong bad ka KSU War Jaintia Circle. Pynban ki paidbah 6 shnong kaba kynthup iaka Mupyut, Skhenpyrsit, Umsalang, Moosakhia, Pynthorlangtein Madantyrpait bad ka KSU War Jaintia Circle kila mih shakhmat ban pyrshah iaka jingthmu bret ñiut shipor ka JMB.

Shuh shuh na kaliang JMB hynnin ka sngi kala pynmih iaka jingpynbna ban tyrwa ban thied jaka na kino kino kiba don jingthmu ban die iaka jaka kaba heh 50 acres ban pynkylla sha ka jaka theh ñiut ka sor Jowai.