Iakhun 8 ngut ki nongïalam sengbhalang; shah jied tang u wei ban thawaiñ

Syllad | The Rising MeghalayaMarch 3, 2019

JOWAI: Ha kane ka elekshon sha ka ïing dorbar thawaiñ jong ka Jaintia Hills Autonomous District Council (JHADC), ki la don haduh phra ngut ki nongialam sengbhalang kiba radbah ha Ri Lum Jaintia hynrei tang uwei na ki uba poi sha ka thong jong ka jingjop bad u une u dei u Brightstar Chyrmang ha kane ka kynti.

U Brightstar uba long Working President jong ka Jaiñtia Youth Federation Central Body u la iakhun na ka NPP bad ula jop donburom da kaba pynrem ia u u MDC jong ka UDP u Marki Mulieh da kaba tam 766 votes.

Haba iakren bad ki nongthoh khubor marsein pynbna ïaka jingjop ha DC Office Jowai,  u Chyrmang ula kyntu kynpham ia ki paidbah kiba kyrshan ia u bad ki bym kyrshan ia u kynthup lang ia u Ma Mulieh ba kin ia treilang na ka bynta ka jingbha jingmiat jong ka Constituency bad jong ka jaidbynriew hi baroh kawei.

Katba u President barim jong Jaintia Students Union Central Body u Rikut N Parien uba la iakhun na ka Congress party ula ioh 3553 katba u bah Habahun Chyrmang na NPP u la jop da 759 vote ïa u President barim ka JSU.

U President barim jong ka Meghalaya People United Front Central Body u Dapoiwanmi Laloo uba ieng na ka PDF u ioh tang 164 votes u la shah pynrem kput ha u MDC jong ka Congress u Awahai Andrew Shullai namar u MDC u la tam ia u Dapoiwanmi Laloo da 3929 votes

U President barim jong ka Ri Jaintia Youth Federation U Ram K Rymbai uba la iakhun kum kyrtong shimet na Jowai South bad u la ioh 134 votes katba u kyrtong ba jop U Saron Pasweth jong ka NPP u la tam haduh 4094 votes ia u  u Rymbai.

U General Secretary jong ka Khasi Students Union Jaintia Hills District Hills Unit u Albinus Lamurong uba ieng na ka PDF na Sumer Konstituensi u la ioh tang 97 votes katba u kyrtong ka UDP Krison Langstang u la jop da kaba tam 1885 votes.

U Secretary jong ka Hynniewtrep Achik National Movement Jaintia Hills u Damonmi Dkhar uba la iakhun na ka party UDP ula ioh 693 votes katba u MDC ka NPP u Thombor Shiwat u la jop biang bad tam ia u Damon da 2841 votes.

Ha Bataw Lakadong Constituency, ki la don arngut ki nongialam sengbhalang kata u President jong ka North East Indigenous People Federation u Marshall Biam u la iakhun kum u kyrtong shimet u la ioh tang 439 bad u kyrtong ka UDP u Dr. Sankey Shangpung u la tam ia u haduh 2338 votes bad u President jong ka Jaintia Coal Miners & Dealers Association u Balios Swer uba la iakhun kum u kyrtong shimet u la ioh tang 333 votes bad u Dr. Shangpung u la tam ia u haduh 2338 votes ban poi sha ka thong.

Kane ka jingrem jong ki hynniew ngut ki nongialam sengbhalang kiba radbah jong ka jaidbynriew bad ka jingioh vote duna jong ki kan pynpaw shai kdar ba ki paidbah jong ka Ri Lum Jaintia kim shaniah ia ki nongialam sengbhalang bad pdiang ia ki kum ki nongmihkhmat sha ka JHADC.