Iakhun jop jaboh plastic ka bor synshar District West Jaiñtia Hills, yn set phatok ïa kiba leh pyrshah
JOWAI: Ka bor synshar District jong ka West Jaiñtia Hills District ban pynlong ïaki shnong ki thaw bad ki um ki wah kiba khuid kiba suba bad ban jop ïaka jaboh plastic kala khang pyrshah ban bret pathar ia baroh ki jait jaboh plastic bad ban pyndonkam plastic ba duna ka jingrben 50 micron ha baroh kawei ka district jong ka West Jaiñtia.
U District Magistrate jong ka West Jaiñtia Hills District ula pynjari da ka kyndon aiñ 144 CrPC bad la mana pyrshah bad bret pathar ïa baroh ki jait jaboh plastic sha ki wah bad ki wah duid bad u la maham ruh ban set phatok bad shain kuna ïa kiba leh pyrshah ia kane ka hukum.
![](https://www.syllad.com/wp-content/uploads/2024/09/JIT-Vacancy-823x1024.avif)
U District Magistrate ula pynmih ka hukum bad ban pyntreikam ruh iaka jingbthah jong ka National Green Tribunal bad kane ka hukum kan treikam ha baroh kawei ka district.
Kino kino ki briew kiba ïaleh pyrshah ïa ka hukm bad pynkhein ïa ki kyndon jong ka Solid Waste Management Rules 2016 bad Plastic Waste Management Rules 2016 kin shah pynshitom hapoh ka kyndon aiñ katkum ka section 45 (A) jong ka Water Prevention & Control of Pollution Act 1974 kaba kynthup ïa ka jingshah set phatok kaba lai bnai lane ka jingshah dain kuna kaba T.10000 ne baroh ar ki jingpynshitom bad ka lah ruh ban bteng da ka jingshah kuna kaba T.5000 manla ka sngi ia kiba leh pyrshah.
Ki jaboh plastic kum ki bilor um ki pla plastic bad ki thermocol na Iawmusiang, na Iawthymme ba pyniaid da ka Jaintia Hills Autonomous District Council Jowai bad kiwei ki iew ba shisien shi taiew baroh ki jaboh ki tuid sha ki wah bad ki wah duid hadien bala hap slap bad kane ka pynjaboh ki um ki wah kaba ym bit ban pyndonkam ia u briew bad kaba kaba ktah ïaki jingim hapoh um kaba bad baroh ki jingthaw ba im kumjuh iaka koit ka khiah u briew.
U District Magistrate ula ioh ka report ba kane ka jingbret pathar ïaki pla plastic, thermocol bad kiwei ki jaboh jabain kila ktah ïa ki wah naduh ka Myntdu, ka Umiurem, ka Myntang, ka Umngot, ka Mynkjai, ka Mynriang bad kiwei kiwei.
Ka NGT ka la bthah ba dei ban pynthikna ïaka rukom bret jaboh jabain katkum ki kyndon jong ka Solid Waste Management ha baroh ki ïew shisien shi taiew bad dei ban pynthikna ban don ka jingkhuid jingsuba bad ban pyniakhlad iaki niut ki nier kiba kiba pyut bad kibym pyut bad ba ki nongshong shnong, ki nongshong ki dei ban don ka jingkitkhlieh ban pynkhuid iaka sawdong sawkun ka mariang ban suk ki pateng ban wan bad kiba mynta.
Ha kawei pat ka hukum, u District Magistrate jong ka West Jaiñtia Hills District u la mana ban shna bad ban sam bad ban die iaki plastic kiba duna ia ka 50 micron ka jingrben bad ia kino kino ki jait plastic ki bym lah ban kdew thikna ïaka jingrben katkum ka kyndon jong ka Plastic Waste Management Rules, 2016 ha baroh kawei ka district.
U District Magistrate u la pynmih ia hukum katkum ka kyndon aiñ 144 CrPC hadien ba la lap ïaka jingbret pathar iaki jaboh plastic, pla plastic ha jaka jngoh kai pyrthei bad ha kiwei kiwei ki jaka, kaba wanrah ka jingsah kut ki nala da ki jaboh plastic kaba wanrah ia ka jingma kaba khraw ia ka mei mariang bad ka koit ka khiah u briew.
Shuh Shuh u Superintendent of Police West Jaiñtia Hills Bah Lakador Syiem kum shibynta ban pyntreikam ïaka kyndon aiñ katkum ka section 101 Meghalaya Police Act 2010 ula kyntu ia baroh ki paidbah ba kim dei ban pynjakhlia iaki lynti synkieng paidbah bad baroh ki jaka jngohkai hapoh ka District lane ban pynwit pynthud iaka leit ka wan u paidbah.
Kino kino kiba leh pyrshah ki shah pynshitom da kaba set phatok katkum ka kyndoh aiñ hapoh ka section 102 jong ka Meghalaya Police Act 2010 bad ka kuna kaba T.5000/-
La kyntu ia baroh ki nongwan jngoh kai ban pynneh iaka jingkhuid jingsuba ki jaka jngoh kai bad ym bit ban bret pathar iaki jaboh plastic bad ki dei ruh ban rah iaka pla thep niut bad kine pla thep niut dei ban bret ha ki jaka ba dep bret niut.
Leave a Reply