Ïakren ka synjuk waheh shnong Ri Jaintia iaka kam rashon, koit ka khiah, ka lad ioh kam bad ka roi ka par

Syllad | The Rising MeghalayaDecember 15, 2021

Ka Synjuk Ki Waheh Shnong Ri Jaintia (SWSRJ) haka 11 tarik une u bnai kala pynlong ïaka jingialang paidbah ha community hall Khliehriat West, East Jaintia Hills District ha kaba kala iakren halor ka kam rashon, koit ka khiah, ka lad ioh kam bad ka roi ka par ki shnong khappud

Haka dorbar ka synjuk ka la shim ïaka rai ban leit buh da ka jingthoh sha ki Deputy Commissioner jong ki ar tylli ki District ban kyrpad ïaki ban pynbeit ïaki jingeh ba ki paidbah ki ïakynduh halor ki kam ration bad ka jingpynslem ban pynïoh card ration ïaki paidbah .

La shim iaka rai ban buh ïaki Fair Price Shop Centre ha la ki jong ki shnong ym shuh ne kawei ki shnong kaba wanrah jingeh iaki kynthei khynnah bad ki tymmen kiba bam rashon ban leit shim iaki mar.

Ka synjuk ka la shim ruh ïaka rai ban buddien ïaka jingslem ban plie bad pyntreikam ïaka Civil Hospital Khliehriat, East Jaintia Hill District kaba la kyntiew kyrdan na ka CHC sha ka Civil Hospital. Ka synjuk kala rai ban leit ïa kynduh ryngkat bad ka jingthoh sha ki bor ba dei khmih ïa katei ka kam mamar lada dang pynslem kan nang ktah shuh shuh ïaki paidbah ba wan sumar bad leit shim dawai ha katei ka CHC.

La shim ruh ïaka rai ban pyrshah shwa ïaka jingpyndait bad pyntreikam ïa u smart metre da ka ophis MEPDCL ha ri Jaintia sha baroh ki shnong ki thaw lymda don shwa ka jingpynshai paidbah bad khlem da ki jingmynjur ki shnong ki thaw namar kan sa ktah ïaka jinglut jingsep lada ki long ka jingsiew kaba heh khamtam ïa kiba duk kiba suk kin sa shem jingshitom bha shibun ban thied ne kylliang ïaki metre bad ki siew bai bording ha ka dor kaba heh. Haka jaka kane kadei ban pynbiang shwa tang ïaka jingshim Reading kiba tikna ne ki thliew ïing baroh ruh kan ïarap hi ban pynpoi ïaka pisa sha ka jingthmu ka tnat ym da kaba kylliang metre ka lah ban pynheh ïa ka bill light.

Ka synjuk ka la rai ruh ban pynsngew sha ka sorkar bad sha ki nongmih khmat jong ka thaiñ ha kaba ïadei ban wanrah ïaka kam pynroi pynpar ha manla ki dong ki shnong naduh ki skul ki kolej ki umbam umdih bad kumjuh ban pynshna noh kham kloi ïaki surok ha ki thaiñ khappud (border) kum ka surok Borkhat, Huroi, Hingaria haduh Umkiang Ratacherra bad kiwei kumjuh ruh ïa ka surok Saipung Block namar ki surok hi ki dei u budlum jong ki shnong haba ïadei bad ki khaii pateng, ka kit ka bah bad ka ïap ka im jong ki dong ki shnong.

Ka synjuk kan buh ruh ka jingkyrpad iaka sorkar ban kyntiew ïa ka Laskeiñ Block sha ka Civil Sub-Division bad kumjuh ruh ban pynkha noh ïa ka C&RD Block Namdong Area namar ba ka Block Thadlaskeiñ kala bun palat ki shnong ba kynthup haka ban pynsuk bad ban pynjan ia u paidbah sha ka ophis block.

Ha kane ka jingialang ka synjuk kala iakren ruh halor ka kam khaïi bad tih dewiong kumba la shah da ka aiñ mining plan policy jong ka sorkar bad la kyntu iaka sorkar ban pynlait kloi noh ïaka chalan khnang ba yn ïoh noh ban iatrei bad khaïi kumba juh long mynshwa, ba u duk u suk un im ja kpoh.

Haka dorbar la shim ruh ïaka rai ban pynsngew ha ka sorkar iaka jingeh ki shnong ha khappud India Bangladesh, khamtam War Jaintia haka thain War East ha ka jingïadei bad ka jingker sainar shiah ban lait duh iaka ki jaka puta.