Ïakynduh ka KSU Barak Valley bad u Ma Pala ïa u Chairman ka HLC ban ïakren pynrung ïa ki Khasi ha ka Assam Accord

Syllad | The Rising MeghalayaSeptember 28, 2019

SHILLONG:  Ka Khasi Students’ Union (KSU) Barak Valley Circle, Assam ha ryngkat u ma  Vincent Pala, MP Ka Jylla ka la ioh ban ïakynduh bad BK Sharma, Chairman jong ka High Level Committee on Implementation of Clause 6 jong ka Assam Accord halor ki kam kiba ïadei ban pynrung ia ki jaidbynriew Khasi-Pnar ha katei ka kyndon.

U BK Sharma u la kular ban shimkhia ïa kane ka sobjek halor ki Khasi-Pnar hapoh Assam ban pdiang ïa ki Khasi Pnar kum ki indigenous tribes ne ki trai ri-trai shnong ha Assam.

U Vincent H. Pala, MP jong ka Shillong, u la kular ban trei shitom na ka bynta ban pynrung ïa ki Khasi kiba shong ha Barak Valley jong ka Assam ha ka Kyndon ne ka Clause kaba 6 jong ka Assam Accord.

Ki nongïalam jong ka KSU Barak Valley kila pynpaw ka jingsngewnguh ia u Ma Fastly Syad na Rymbai uba la iarap ban ioh iakynduh ia u BK Sharma, Chairman jong ka High Level Committee on Implementation of Clause 6 jong ka Assam Accord ha kaba la ïadonlang ruh u Bah Vincent Pala.

Ka Clause 6 jong ka Assam Accord, ka ong ba kan don ka jingïada kyrpang ïa ki jaidbynriew Assamese lyngba ki aiñ. Nalorkata ka ong ruh ba kan don ka jingïarap ban kyntiew ha ka liang ka kolshor bad ban pynneh pynsah ïa ki riti ki dustur.

Ha kane ka jingïakynduh kaba la long ha nongbah Guwahati ha ka sngi Thohdieng, na ka liang u Bah Pala, u la kular ba un trei shitom ban ïakren bad ki bor sorkar ka Assam khnang ba ki paid Khasi kiba shong ba sah ha Barak Valley kin ïoh la ki hok ba kidei ban ïoh ha jylla Assam.