Iakren u CM ka Assam, Meghalaya halor ki kam iapynbeit pud shwa ban leit jurip lang ha u bnai Risaw

Syllad | The Rising MeghalayaSeptember 13, 2023

U Myntri Rangbah ka Assam u Himanta Biswa Sarma ha ka jingiakynduh bad u CM ka Meghalaya u Conrad Sangma haka sngi Balang kila pynlong ka jingiakren halor ka kam ia pynbeit pud hapdeng kine ki ar jylla bad rai ban thaw iaki lad ki lynti ban wanrah iaka jingsngewskhem u paidbah khappud hashwa ba kin pynlong ka jingleit jurip lang sha ki jaka kiba don ka jingiakajia ha une u bnai Risaw u ban wan.

Haba kren sha ki lad pathai khubor u Sarma u la ong; “Ngi kwah ban ia shong iamir jingmut bad lehse ngin lah ban shim ia ki katto katne ki sienjam hashwa ban leit jurip sha kitei ki jaka khappud namar ngi kwah ba kane ka jingwan jngoh ka jong ngi kam dei ban pynmih ia ka jingiakynad lada ngin (CM) leit sha kitei ki jaka bad hadien ba ngi la wanphai ba kan ym mih biang ka jingiakynad kaba thymmai bad tei pop ia ngi.”

Hadien ba la dep ban iathir bniah baroh arngut ngin ia leit sha kitei ki jaka bad ngin iakren bad ki briew jong ki shnong khappud kumjuh. Haba ngi la leit shapoh Langpih ki la don shibun ki jingialehkmen, kumta ruh ngi kwah ba kane ka jingleit sha Karbi Anglong bad Jaintia Hills ruh kan long kumjuh.

“Nga kwah ban pyndep noh ia kane ka jingleit ha une u bnai Risaw u ban wan. Lada u CM ka Meghalaya um lah ban wan sha Guwahati ha ka taiew ba nyngkong jong u bnai Risaw, ngi lah ban leh ha ka taiew kaba ar jong une u bnai,” ong u CM ka Assam.

Halor ka jingkylli lano ki Regional Committee kin aiti ia ki kaiphod, u Sarma ula ong kumba la pynpaw ba kine ki hynriew tylli ki jaka ki dei kiba kham jynjar ban ia pynbeit, kumta ia kine ki Regional Committee la khlieh da ki briew kiba la rangbah na baroh arliang kila treii shitom bad leit jurip ruh ia kitei ki jaka bad ngi ngetit ba ia baroh kine ki jingeh yn sa lah ban iapynbeit da ka lynti jong ka iasngewthuh jingmut lang.

Nalor kata da kaba  kyntu ia ki paidbah ha ki thain khappud ba kin pynneh ia ka shongsuk shongsain, na ka liang u CM ka Assam ula kular ba ki artylli ki Sorkar Jylla kila pyrshang katba lah ban pynbeit noh ia ki jingiakajia kat kum ka jinghun jong u paidbah na baroh arliang jong ka Assam bad Meghalaya.

Shuh shuh u la ong ba ki nongshong shnong ha ki thain khappud ki dei ban kynmaw ba ngi la trei khlem shongthait ha kaba iadei bad kane ka kam ban pynbeit ia ka jingiakajia. “Ngi kwah ban buh ha ka jingmut jingpyrkhat jong ngi ia ka bha ka miat jong ki paidbah kiba ioh jingim na baroh arliang khappud. Ngi kwah ban iada ia ka bha ka miat ki paidbah kiba shong ba sah ha ki jaka  khappud. Kumta ki dei ban pynneh ia ka jingjai jai bad don hapdeng ka jingsuk bad ruh ban iarap ia ngi, ngin ia pyrshang ban pynbeit noh ia ka jingiakajia pud kat kum ka jingpdiang lang jong ki nongshong shnong na Assam bad Meghalaya”, ong u Himanta.

Na ka liang u CM ka Meghalaya hashwa kane u la ong ba kane ka jingiakynduh ka dei shibynta na ka kam ban iakren ia  kine kiei kiei khnang ba kan iarap ia baroh artylli ki Jylla ba kin ioh ia ka jingshai kaba kham bha.

U Conrad Sangma u la ong ruh ba kam pat don sati kano kano ka jingmih na kane ka jingiakynduh bad kane ka jingiakynduh kan dang iai bteng na ka por sha ka por, kata da kaba ai khublei ia u Myntri Rangbah ka Assam, u CEM ka KAAC bad u Symbud Myntri Rangbah ka Jylla, uba khlieh ia ka Regional Committee ka Jaintia Hills.