Iakren u Sanbor ia u Myntri Sorkar Pdeng ban kyntiew kyrdan ia ka Red Cross Hospital

Syllad | The Rising MeghalayaFebruary 13, 2025

Ki nongmihkhmat ka BJP na ka Jylla hapoh ka jingialam u MLA ka South Shillong u Bah Sanbor Shullai bad u President ka party u Rikman Momin dang shen ki la iakynduh ia u Myntri ka Sorkar Pdeng uba khmih ia ka Tnad Minority Affairs ha ryngkat ka jingtyrwa ban kyntiew kyrdan noh ia ka Red Cross Hospital, Laban da kaba shna bujli noh ia kane ka jingtei kaba la rim bah da ka jingtei kaba thymmai ryngkat ki jingdonkam kiba katkum ka juk mynta.

U Bah Sanbor u la ong ba ka Red Cross Hospital kaba hap hapoh South Shillong constituency ka la donkam ban kyntiew kyrdan noh khnang ba da ki hajar hajar ngut ki longiing baduk (BPL) kin bteng ban ioh ia ki lad jingsumar kiba paka.

Nalor kata u la pynpaw ruh ba kane ka hospital ha kaba la kha ia u ka dei ban long kawei na ki hospital pynkha khunlung kaba bha tam ha kane ka nongbah Shillong.

U MLA u la ong ruh ba ha ka jingiakren iamir jingmut, na ka liang u Myntri u la pynpaw ia ka jingsngewtynnad bad ka jingdon mon ban pynioh ia kane ka jingtei kaba thymmai ha kaba ia ka Detailed Project Report (DPR) yn sa iasam bad ka Tnad Minority Affairs hadien ka elekshon.

Kane ka kynhun ka BJP shen kan sa iakynduh ruh ia u Myntri Rangbah ka Jylla u Conrad K Sangma ban kyrpad ia u ban phah ia kane ka jingtyrwa sha ka Tnad Minority Affairs kum ka mat kaba hakhmat eh.

U Bah Sanbor u la ong ruh ba ka dei ka jingkular ka jong u ban pynkylla ia kane ka hospital sha ka jingshisha, kata ha ka por ba u dang don ha ka kam.

Ha kajuh ka por une u MLA ka BJP u la ban jur ruh ba ka jingpynjur ia ki kam ban ia ka ktien ka dei ka bynta kaba kongan ha ka kam sain pyrthei.