Iakynduh HYC, JYF ia u DC ka EJH ba pynslem ia ka eksam DSC 

Syllad | The Rising MeghalayaAugust 14, 2023

Ka Hynniewtrep Youth Council, EJH bad ka Jaintia Youth Federation EJH, ha ka 11 tarik mynta u bnai ki la leit ban iakynduh ia u Deputy Commissioner ka East Jaintia Hills ha kaba ki la kyntu na ka bynta ban pynkloi ha kaba iadei bad ka jingpynlong ia ka eksam District Selection Committee (DSC) bad ruh ban pyntreikam ia ki prokram ai jinghikai na ka bynta ki samla wad kam.

Kane ka jingdawa jong kine ki ar seng ka la wan long hadien ka jingpynslem ha kaba pynlong ia ka eksam DSC bad iakren ha kaba iadei bad ki post kiba lait na ka bynta ka jingmyntoi jong ki samla wad kam. La pynpaw ruh ba ki post kiba lait ia kiba la pynmih da ka district naduh u snem 2021 ki dang thylli wat hadien ar snem kaba la pynlong ia ki nongaplai ba kin duh jingkyrmen.

Kumta ruh da kaba pynpaw halor ka jingdonkam ban pynkloi ia ka jingpynrung kam, ka seng HYC bad ka JYF ka la pynlong ia ka jingiamir jingmut kaba seisoh bad u DC ka EJHD, u Abhilash Baranwal, IAS khnang ban lah ban weng ia kine ki jingeh.

Ha kane ka jingiakynduh ki nongialam jong kine ki ar seng ki la pynpaw ruh halor ki jingeh bad jinglynga jong ki samla ha kaba iadei bad kane ka jingpynslem da kaba kyntu ruh halor ka jingdonkam ban pynkloi bad ban khmih ba ka jingpynrung kam ka dei ban long da ka lynti kaba khuid ba suba khnang ba kan plielad mar kumjuh ia baroh ki samla wad kam.

Kumjuh kine ki nongmihkhmat ki ar seng ki la pynpaw ruh halor ka jingdonkam ban pynlong ia ki prokram aijinghikai khnang ba kan iarap ia ki samla ki ban iakhun ia ki kam kiba lait ha ki tnat sorkar bapher bapher.

Halor kane ka bynta na ka liang u DC ruh u la pynthikna ha ki nongialam ki ar seng  ba na ka liang ka sorkar kan shimkhia halor kane ka bynta khnang ba kan long ka jingmyntoi kaba khraw na ka bynta ki samla wad kam kiba pynkhreh ban iakhun ia ki eksam DSC ki ban dang pynlong nangne shakhmat.Nalor kta u la kular ruh ban pynlong noh kloi ia ka eksam DSC na ka bynta ka jingmyntoi jong ki samla wad kam.