Iakynduh jingeh ka sorkar ban ioh ia ka jaka shipai ban pynkynriah iaki Harijan na Them Metor

Syllad | The Rising MeghalayaJanuary 23, 2025

U Myntri Rangbah ka Jylla u Conrad K Sangma ha ka 22 tarik Kyllalyngkot u la ong ba ka jingkyrpad jong ka sorkar jylla ban pynioh ia ka jaka jong ki shipai na ka bynta ban pynkynriah ia ki 342 tylli ki longiing Harijan ne Them Metor, Iew Mawlong ka la iakynduh ia katto katne ki jingeh namar ka jingdon ki katto katne ki kyndon ba pyrkhing jong ki shipai.

Haba kren sha ki lad pathai khubor, u CM u la ong, “Ki don katto katne ki jingeh kiba don hangtei.Lada phi kynmaw ngi la kyrpad ia ka Defence Ministry ban ai katto katne ka jaka kaba ki longtrai lane kaba don ha u pud u sam jong ki bad ngi la ioh ruh ia ka jubab na ki heh shipai, hynrei ki don katto katne ki kyndon kiba don ha ki rukom treikam jong ki shipai kiba dei ban bud ryntih bad kiba la wanrah jingeh.”

“Ki shipai ki don ia ki kyndon treikam kiba pyrkhng ha kaba iadei bad ki kam tei jingtei kiba lah ban jia hajan ki jaka jong ki shipai, bad kumta kine ki jingpyrkhing ki la wanrah ia ki katto katne ki jingeh ia ngi mynta,” u la bynrap.

Haba kylli, u Conrad u la ong, “Ngam lah ban batai bniah ia ki jingtip namar ki long kiba kham kyllain, hynrei ngi dang khmih kumno ba ngin lah ban pyniaid shakhmat ia kane ka jingthmu kaba la iaid la slem bha, bad ngi don ka jingangnud ban lah ban iohi ba kane ka kam kan kut noh.Kumta ruh ngi shim ia baroh ki sienjam kaba kynthup ban pynlong ka jingiakren bad ki shipai ha kaba iadei bad kane ka phang.”

“Namar ngim lah ban iakren pynkut ia kane ka kam lane ban shim rai, ngam kwah ban iakren ei ei ia mynta, ka kam ka dang iaid, ngi dang iakren bad ngi kyrmen ba ngin lap ia ki lad ki lynti, hynrei nga tharai ba ka dang kloi palat kumba nga ong ba ki kyndon jong ki shipai ki kham shem shitom kumta ngin hap ban bud ia kine ki kyndon bad ngin sa peit shano ngin poi,” u la bynrap.