Iakynduh ka Chairperson ka CEW ia ka lanot ba shah thombor ha WGH

Syllad | The Rising MeghalayaJuly 4, 2024

Ka Committee on Empowerment of Women ka Meghalaya Legislative Assembly ha ka 2 tarik Naitung ka la pynlong ia ka jingialang hapoh ka ophis u Deputy Commissioner ka West Garo Hills ha Tura ha ka jingiadon lang ki DC jong ka West bad South Garo Hills, Superintendent of Police SGH lem bad kiwei pat ki heh ophisar.

Ka jingkhot pynlong ia kane ka jingialang ka long ban iakren halor kiba bun ki mat khamtam ha kaba iadei bad ki kam thombor pyrshah ia ki kynthei khynnah.

Ia kane ka jingialang la pyniaid da ka Chairperson ka Committee ka kong Santa Mary Shylla ha ka jingiadon lang ki dkhot ka Committee kiba kynthup ia u Marthon J Sangma, ki MLA Bah Matthew B Kurbah, Brightstarwell Marbaniang, Gabriel Wahlang bad Bah Damanbiat Lamare.

Ha kane ka jingleit jngoh, ka Committee ka la leit iakynduh ruh ia ka lanot kaba la ngat ha ka jingshah thombor ha ka kynhun jong ki shynrang briew hakhmat u paidbah ha ki bynta jong ka shnong Lower Teksragre ha Damal A.sim. Mynta kane ka lanot ka dang don hapdeng ka jingshah sumar hapoh ka One Stop Centre ha Tura, West Garo Hills.

Na ka liang ka Chairperson ka la pynpaw ba ha katei ka jingialang ki la ioh ban iakren halor kiba bun ki mat ba kongsan hapoh jong kine ki artylli ki district, kata da kaba pynleit jingmut kyrpang ruh halor ki kam pyntriem pyrshah ia ki kynthei khynnah.

Ka la ong ruh ba ka Committee ka don ia ka jingthmu ban rah ia kine ki mat ha ka jingiakren bad ka sorkar, kata da kaba kdew ruh halor ka jingdonkam ia ki jaka ri khunswet bad ki jingshakri halor ka  jingshah ktah ha ka bor pyrkhat pyrdain.

Ha kaba iadei bad ka jingiakynduh ia katei ka lanot na ka shnong Lower Teksragre, na ka liang ka Chairperson ka la pynpaw ba ka jinglong jingman ha ka jingkoit jingkhiah ka jong ka, ka la kham biang.