Iakynduh ka DGP ia ki paidbah ha ka sien banyngkong; kular tehlakam ia ki kam pynklumar shnong

Syllad | The Rising MeghalayaMay 31, 2024

Ka Director General of Police (DGP) ka Meghalaya, ka Kong Idashisha Nongrang ha ka 30 tarik Jymmang ka la pynlong ia ka jingialang kaba nyngkong eh bad ki paidbah ban iakren halor ki jingeh kaba ki paidbah ki iakynduh bad halor ki mat kiba ktah ia ka Jylla hi baroh kawei.

Haba kren sha ki lad pathai khubor hadien ka jingiakynduh ia ki 22 tylli ki kynhun bad riew paidbah, ka Kong Nongrang ka la ong ba ka long kaba sngewtynnad shibun ba ki riew paidbah na kylleng ki la wan ban iakynduh. Ki la don katto katne kiba wan ban pynsngew ia ka jingeh, ki la don kiba wan ban pan jingiarap, ki don arngut kiba wan ban iakren halor ka mat kaba iadei bad ki pulit kiba la khlad noh hapdeng ka kam bad kyrpad na ka bynta ka lad aikam aijam ha kaba ngi la buh jingthoh ia kine baroh.

 “Ki la don khyndiat ngut kiba la wan tang na ka bynta ban ai khublei bad ki don ruh kiba la pynpaw ia ki jingeh. Kumta nga la iakren kumba katto katne por bad ki ha kaba ki don ruh ki bynta kiba bym iadei bad ka tnat. Kumta haba ki la nga la aijingmut ba kin rah sha ki bor ba dei khmih,” ka la bynrap.

Ka DGP ka la pyntip ruh ba ki don ar kynhun kiba wan ban pynsngew ha kaba iadei bad ki jingeh jong ki briew kiba don jingduna ha ki dkhot met kiba la kyrpad ban pynioh ia ki jinghikai pyntbit ia ki pulit ka Tnat Traffic khnang ba kin nang ban iadei bad ki briew kiba don jingduna ha ki dkhot met ia kaba ka la kular ban shim mardor ia ki sienjam.

Nalor kata ka Kong Nongrang ka la pynthikna ruh ban shimkhia ha kaba iadei bad ki kam thaw jingklumar ha kylleng ki bynta jong ka Nongbah Shillong.

Haba kylli, ka DGP ka la ong ba ka la don ruh ka kynhun Taxi Aggregators hynrei ia kaba ka la pynpaw ba kam hap satia hapoh ka jingkhmih jong ka tnat.

“Ki la don ruh katto katne kiba phone namar ka jingkwah iakynduh ha kiwei pat ki sngi ia kaba nga la ong ki lah ban wan iakynduh hynrei ki hap ban shim ia ka jingbit, hynrei mynta ka sngi ki lah ban shu wan rung beit kumta,” ka la bynrap.