Iakynduh ka DS ia u CEM, Chairman DC ban kyntu pynneh ia Nartiang ha kajuh ka constituency

Syllad | The Rising MeghalayaMarch 28, 2024

Ka Ophis jong ka Dorbar Shnong Nartiang, West Jaintia Hills District hapoh ka jingialam jong u Waheh Shnong u Ma Mom Phalangki bad u Secretary u Bah Sati Swer ha ryngkat ki dkhot jong ka shnong haka 27 tarik Lber, kila ai dorkhat sha u Chief Executive Member (CEM) ka JHADC u Ma Thombor Shiwat ban kyntu ban pynneh iaka Nartiang Umladang MDC Constituency.

Ka bor shnong jong ka Nartiang kala iakynduh ruh ia u Chairman ka Delimitation Committee (JHADC), u Dr. Dakyntuhimi Lyngdoh bad aiti ruh ia ka dorkhat kaba la pynpaw ia ka rai jong ka Dorbar kaba la long ha ka 12.03.2024 ban pynneh ia ka shnong Nartiang hapoh ka Nartiang Umladang constituency kaba don mynta.

Na kaliang u chairman delimitation committee, ula pynpaw ba kam pat don kano kano ka rai ban ban phiah ia kano kano ka constituency.

Ka Dorbar Shnong Nartiang kala pynpaw halor ki jingsngewkhia jong kiba bun ki kynhun kiba don bynta kaba kynthup ruh ia ki nongshong shnong kiba hap hapoh ka Nartiang-Umladang Constituency.

Na ka liang ki nongshong shnong ki la kyntu ban pynbeit iaka constituency kaba thymmai da ka jinglong khuid bad na ka bynta ka jingbit jingbiang jong ki nongshong shnong.

Shuh shuh ki la pynpaw shai ruh ba kin ym iashim bynta ha kane ka ilekshon ka ban wan lada na ka liang ki bor ba dei khmih ki pyniaid shakhmat ia kane ka jingthmu.

U Ma Thombor Shiwat, CEM JHADC, haba kren ha ka dorbar mang tyngka ka konsil dangshen ula ong ba kane ka jingpynbeit thymmai iaki constituency MDC ka dei na ka bynta ban pynbeit iaka jingdon ki nongthep vote bad jingpynbeit iaki shnong katkum ka jinglong jingman jong ki bad kam dei satia ban pynkhlad iaki shnong. Ka ei kaba paw bad saphriang sha ki social media kam dei kaba pura bad ka delimitation committee ka hap ban khot iaka jingpynsngew paidbah shuwa ban shim kano kano ka rai katkum ka hukum jong u Lat ka Jylla, ong u CEM haka dorbar.