Iakynduh ka KSU-EJH ia u DC ba slem ioh ‘Income Certificate’ ki samla aplai scholarship

Syllad | The Rising MeghalayaOctober 25, 2024

Ka Education Cell ka KSU East Jaintia Hills District Unit hapoh ka jingialam u Assistant Education Secretary u Samla Benito Suja ha ka 25 tarik u Risaw ka la leit iakynduh ia u Deputy Commissioner ka District ban phah tuklar lem halor ki jingeh kiba ki samla aplai scholarship ki iakynduh namar ka jingslem ban ioh ia ka ‘Income Certificate.’

Ka KSU hadien ba ka la ioh pdiang ia ka jingujor na ki samla pule ka District kiba aplai ia ka scholarship ka la pynpaw ka jingsngewkhia kaba jur namar ka jingpynslem ban ‘Income Certificate,’ kaba dei ban shim por tang shi sngi ar sngi ha ki snem kiba la dep, hynrei mynta wat hadien palat ar taiew ruh kim pat shym la ioh satia.

Ka KSU ka pynkynmaw ruh ba ka rukom aplai scholarship ha ki snem kiba la dep ka  donkam ia ki khynnah ban ioh tang ia ki affidavit income na ki lawyer bad ka long kaba suk ban aplai ia ka scholarship.

Hynrei dang ha une u snem bad ki bnai ba la leit ka sorkar lyngba ki bor District ka la pynmih hukum ba ia ka ‘Income Certificate’ ban aplai Scholarship yn hap ioh na DC ba la sign da ki Magistrate.

Ia kane ka hukum la pynmih ban pynsuk ia ki khynnah hynrei ka long pynban markhongpong namar ka wanrah pynban ka jingeh ia ki khynnah kiba kwah ban aplai scholarship namar ka jingpynslem ban ai ia ki ‘Income Certificate’ bad kaba la pynlong ruh ia ki khynnah ba kin sngewtieng ioh ba kin duh ban aplai ia ka scholarship.

Halor kane ka jingeh kaba ki samla pule ki iakynduh ka seng ka la kyntu jur ia u DC ban wad ia ki lad lynti kumno ban weng ia kane ka jingeh da kaba ai jingmut ruh ba dei ban pynbun ki nongtrei da kumba 3 ne 4 ngut ha kum kine ki khep ba donkam. Ka KSU kala ong ruh ba ki nongtrei ba dei peit bunsien i shim shuti kaba nang pynslem ia ka kam.

Na ka liang u DC u la ong ba un sa bthah ia ka Tnad ba dei khmih ban pynduna ia ki kyndon ban aplai khnang ban pynsuk ban ioh kloi ia ki ‘Income Certificate’ na bynta ki khynnah ki ban aplai ia ka scholarship, ong u nongialam ka KSU.

Na ka liang ka seng ka la ong ba kan iaibuddien halor kane ka kam ha kine ki sngi ki ban wan khnang ban pyntikna ba ki khynnah kin ym don jingeh ban aplai scholarship.

Ha kajuh ka por na ka liang u DC u la ong ruh ba lada ki khynnah ki donkam kyrkieh ia ki ‘Income Certificate’ ki lah ban kynduh markhmat ia u khnang ba ka kam kan long kaba iaid beit iaid ryntih.