Iakynduh ka KSU-EJH ia u SP ban dawa buh No Entry ha ka por thoh eksam ki khynnah skul

Syllad | The Rising MeghalayaNovember 19, 2024

Ka Khasi Students’ Union (KSU), East Jaiñtia Hills District Unit ha ka 19 tarik Naiwieng ka la leit iakynduh ia u Superintendent of Police ka District ban dawa buh ‘No Entry’ ha ka por thoh exam ki khynnah skul jong ki ar tylli ki skul, kata ka Narpuh Modern Secondary School Umkiang bad ka Holy Cross Hr. Secondary School Umkiang namar ki jingeh kiba ki khynnah skul ki iakynduh.

Ka Seng ka la pynpaw ka jingsngewkhia bad sngewdiaw shibun halor ki jingeh kiba ki khynnah skul jong kine ki artylli ki skul ki iakynduh, kata hadien ba ki la ioh jingtip ba ki don ki khynnah skul kiba pule ha kitei ki skul kiba dei naduh ka shnong Kuliang, Pyrtakuna, Donaskur, Dona Umbluh bad kiwei kiwei.

Kine ki khynnah skul ki hap ba wan da ki kali na kitei ki shnong kiba jngai. Hynrei namar ka jingdheng kali kaba jur manla ka sngi, ki khynnah skul ki hap ban iaid da ka kjat ryngkat bad u pum pum ba shyrkhei kaba ktah jur ia ki khynnah skul.

Ha kane ka jingiakynduh jong ka Seng na ka liang u SP u la kular ban shimkhia ia kane ka kam na ka bynta ka jingbit jingbiang jong ki khynnah skul.

Ka seng ka la iathuh ba ka Narpuh Modern Secondary School ka la sdang ia ka eksam final, bad yn jia aiu ia ki khynnah skul lada kim ioh ban thoh exam lada kane ka jinglong jingman kan dang iai bteng. Kumjuh ka la ong ruh ba ka skul Holy Cross Umkiang ruh kan sa pynlong noh shen ia ka eksam.

Kumta na ka bynta ka bit ka biang jong ki khynnah skul ka seng KSU-EJH ka la dawa ban buh noh da ka ‘No Entry’ ha Pyrtakuna bad Dona Umbluh. Kata ki kali heh kiba wan na Khliehriat ban leit sha Kalaiñ yn bat ha shwa ban sdang u pud jong ka shnong Pyrtakuna bad ki kali ba wan na Silchar yn bat ha Dona Umbluh.

Haba ia kren u SP u la ong ba yn sdang ban bat kali naduh ka por 7:30 am haduh 9:30 am kata 2 kynta, bad kata ka mut tang shu rung ki khynnah shapoh skul yn pyllait noh ia ki kali. U SP u la ong ba ki kali rit kin iaid kumba ju long.

Halor kane ka Seng ka la kyntu ia u SP ban sdang pyntreikam noh noh mardor namar kumba long mynta ka skul Narpuh Modern Umkiang ka la iaid ka jingthoh eksam.

Ka Seng ka la ong ba na ka liang ki kmie ki kpa ki lynga pisa ka mynsiem namar ki khun jong ki, ki ioh ia ka jingpang khieshoh, jyrhoh namar ki hap ban iaid lyngba tdem surok ba ka sorkar ka ai sngewbha ia ki paidbah ka thaiñ Dong Namchiang

Shuh shuh ka seng ka kyntu ia ka Sorkar, NHAI bad ia ki kontraktor ban siang shwa nyngkong ia ka surok ha ki shnong ba ka kam ka dawa kyrkieh namar ka aïom lehkmen Khristmas ka la hajan, bad ba ki paid riewngeit Khristan ha la ki jong ki kynhun kin ioh ban ia shad kmen ym hapdeng u pum pum.