Iakynduh ka KSU-EJHD ia u EE ka Tnat MePDCL halor ka jingkiew ka bill light

Syllad | The Rising MeghalayaNovember 25, 2023

Ka Khasi Students’ Union (KSU) East Jaintia Hills District Unit hapoh ka jingialam u President u Streamly S Suchen, u  Assistant General Secretary u Pynshai Kupar Dkhar bad kiwei ha ka 24 tarik mynta u bnai ki la leit ban iakynduh ia u EE ka Tnat MePDCL  ha Moowakhu ban pan jingpynshai halor ka jingkiew jong ka bill light ha ki shnong bad ki thain jong ka East Jaintia Hills District.

Na ka liang jong u EE u la pynpaw ba ka jingkiew jong ka bill light ka don bun ki bynta bad kawei na kine ka dei na ka daw ba ka ophis ka ju pynbeit thymmai lane ka ju pynkiew manla u snem ia ka dor ki bill, kata naduh ki domestic, commercial bad ki high voltage tension.

Ka ba ar u la ong ba ka dei ka jingbym don ki meter reading jong ki longiing kaba la pynlong ia ka ophis jong ka MePDCL ban sam ia ki bill da ka ba shu kheiñ antad ka ba mih ka jingduh nong ia kiba khlem pyndonkam heater, refrigerator bad kiwei de ki tiar ilektrik namar ka bill light ka kham kiew, katba ki longiing ba pyndonkam ia heater, refrigerator bad ki tiar bording bapher bapher ka bai bording ka la kham shong tad.

Na ka liang ka seng ka la pynpaw ia ka jingbym sngewhun ia kane ka jingaidaw jong u EE ka MePDCL da kaba ong ba ka lah ban don kaei kaei re ba buhrieh sha lyndet,bad ka seng ka la ong ba kan iai buddieñ ba balei kane ka jingkiew ka bording electric ka kiew sted khlem don kano kano ka jingpyntip kaba bniah ne official notifications na ka Ophis sha ki longiing jong ki shnong bapher bapher hapoh u pud u sam ka East Jaintia Hills District.

Halor kane ka bynta ka seng ka la ong ba kan sa pynlong ia ki jingpynshai paidbah ha ryngkat ka jingiatreilang bad ki nongtrei ka MePDCL Khliehriat distribution division ha ki shnong ki shnong katba lah lyngba ki shnat treikam ka seng kiba don hapoh East Jaintia khnang ba ki paidbah kin shai shuh shuh bad ba kin lah ban sngewthuh kham bha halor kane ka mat.