Ïakynduh ka kynhun ki nongïalam niam ia u Lat ka jylla halor ka jingshah lehbeiñ ki Khristan

Syllad | The Rising MeghalayaFebruary 26, 2022

Ka kynhun ki nongialam Khristan ha Shillong haka sngi Thohdieng kila iakynduh ïa u Lat ka Jylla u Satya Pal Malik, ha Raj Bhavan Shillong halor ka jingshah lehbein ki nongshong shnong kiba dei ki Khristan bad ka jingpynjulor iaki iingmane hapoh ka ri.

Kane ka kynhun nongialam niam ki kynthup ïa u Rev EH Kharkongor, Secretary jong ka Khasi Jaintia Christian Leaders Forum, Rev Fr Richard Majaw, Vicar General ka Shillong Archdiocese, Rev Himanshu Christian, Presbyter ka All Saints Cathedral, Church of North India Shillong, bad u RO Wallang dkhot jong ka Balang Presbyterian.

Kane ka kynhun ka la ai ka shithi kaba pynshisha ba ka niam Khristan ka la long ka bynta jong ka jingim ha ri India lah 2000 snem mynta, bad naduh kita ki por ki seng Khristan bad ki briew shimet ki la noh synñiang shibun eh sha kane ka ri jong ngi, kaba dang iai bteng haduh mynta – ha ka liang ka thoh ka pule, ka koit ka khiah, ka jingkyntiew ia ki jaid bad kynhun bynriew kiba dang kham sahdien bad sha ki kam kyntiew-ri.

Kane ka shithi ka kren shai ruh ba ki riewngeit Khristan ha ka ri India ki long ka kynhun kaba ritpaid kaba long tang 2.3% na ka jingbun briew ha kane ka ri, bad ki long kiba don ka jingiadei kaba bha bad ba iashongsuk shongsaiñ bad kiwei pat ki jingngeit bad jaidbynriew ki bapher bapher ha ka ri.

Hynrei ha kine ki arphew snem eiei mynta, kane ka jingiaburom iwei ia iwei, ka jingshaniah bad jingsngewtynnad ka la sdang duh noh da ki jingbyrngem jong ki jingshun, ki jingleh jubor bad kiwei – kiba la nang kham jur shuh shuh ha kane ka por kaba mynta ha ki rukom ki bapher bapher.

Ha kiwei kiwei ki jaka, ka India ka sakhi ia ki kam sniew bad ki kam beaiñ pyrshah ia la ki jong ki nongshongshnong kiba dei ki Khristan – naduh ka jingpyniap bad pynmynsaw ia ki missionary bad ki Pastor, haduh ki jingshahbeh na la ki jong ki iing ki sem ha ki ‘riew hehpaid, haduh ki jingpynjulor ia ki tiar kiba kyntang bad ki iingmane, wat haduh kaba shna bad pyntreikam ia ki aiñ bad ki hukum sorkar kiba khanglad ia u ne ka nongshongshnong shimet ban jied ia la ka jong ka jingngeit.

Ki jingleh jubor bad ki jingiashun ki dei ban sangeh noh. Kum ki nongshongshnong ha kane ka ri kaba khraw jong ngi, ka donkam ba ngin ia shong ha ka jingiasuk, da ka jingieit, ka jingburom bad ka jingshaniah – ki ban tei ha baroh ia ka jingkyrmen kaba bha na ka bynta ka lawei jong ka ri.

Da ka jingsngewkhia halor kine kiei kiei, kane ka kynhun ka la ban bad shon ha u Lat kum u briew uba kyrshan ia ki kam ba donkam – kum ka jingkyrshan jong u ia ki nongrep ha ka ri – ban shim khia ia kine bad ban pynsngew ruh ia ki ha ki nongsynshar bad nongialam ha ki Jylla kiba pher ha ka ri bad ha ka sorkar Pdeng de.

Ha kaba u kdew shaphang ka jingshongsuk bad jingiadei ba bha hapdeng ki kynhun kiba pher ha Shillong bad ka thaiñ lam-mihngi, da ka jingkylluid mynsiem u Shri Satya Pal Malik, u Lat badon burom, u la ai ka jingsngewskhem ha kane ka kynhun ba dalade hi un sa pynsngew ia kine baroh ha ki nongialam jong ka ri ha ka Sorkar Pdeng.