Iakynduh ka SSSS Byrnihat ia u CEM bad Syiem Mylliem ban pyrshah ia ka jingdawa long Rangbah Shnong ki paid Garo

Syllad | The Rising MeghalayaApril 9, 2024

Ka Synjuk ki Seng Samla Shnong (SSSS) Byrnihat Area, Ri Bhoi District haka 9 tarik Iaiong, ki la leit syndon ban iakynduh ia u Chief Executive Member (CEM) ka Khasi Hills Autonomous District Council (KHADC) bad ruh ia u Syiem Mylliem ha ryngkat ka dorkhat ban pyrshah pyrshah jur ia ka jingdawa jong ki paid Garo ba dei ban ailad ban long rangbah shnong ia ki Garo ha ki shnong Garo kiba don ha Ri Bhoi District bad khamtam ha Raid Marwet kaba hap hapoh ka Hima Mylliem Syiemship.

Kane ka jingleit iakynduh jong ka Synjuk hapoh ka jingialam jong u Chairman u Kitbor Suting bad u Secretary u Ricky Lapang ha ryngkat ka jingsynran lang da ku Chairman ka Synjuk ki Rangbah Shnong Ri Bhoi District u Bah B.B Makdoh bad ruh ka Synjuk ki Seng Samla Shnong Shillong City, ka ka la wan long hadien ba ki paidbah Garo lyngba ka All Ri Bhoi Garo Headmen Association bad ka All Khasi Hills Achik Federation ki la dawa ba dei ban ailad ïa ki Garo ban long Rangbah shnong ha kaba ki la wan ruh ban ïakynduh ïa u Myntri Rangbah ka jylla u Conrad K. Sangma ha ka 7 tarik u Lber 2024 ban shimkhia ïa katei ka mat jingdawa, ha kaba ka All Khasi Hills Achik Federation ha ka 16 tarik u Lber 2024 ka la pynlong ruh da ka jingïalang ha Nongspung A na ka bynta ban ailad ban long rangbah shnong ïa ki Garo bad ruh ban dawa ai sanad ïa kita ki rangbah Shnong Garo.

Kumta dei halor kitei ki nongrim ba ki SSSS Byrnihat Area haka 9 tarik Iaiong ki la shim da kane ka lynti ban iakynduh ïa u CEM ka kHADC, u Bah Pynïaid Sing Syiem bad ruh ïa u Syiem ka Hima Mylliem u Paiem Ainam Syiem ryngkat ka dorkhat ban pyrshah jur ba kim dei ban ailad ban long rangbah shnong ïa ki paid Garo ha Ri Bhoi, namar kane ka jingdawa jong ki ka long kaba khlem nongrim bad ka long pyrshah ïa ka Mylliem Act 2007 bad ruh ïa ka United khasi Jaintia Autonomous District Council (Appointment and succession of Chiefs and Headmen) Act, 1959.

Haba kren sha ki lad pathai khubor hadien ka jingïakynduh ïa u CEM ka KHADC bad u Syiem ka Hima Mylliem, u Chairman ka Synjuk ki Seng Samla shnong Byrnihat Area ryngkat kiwei ki nongialam ki la pynpaw ïa ka jingpyrshah kaba jur halor kane ka jingdawa ki paid Garo ban ioh long rangbah shnong bad ruh ban ioh ïa kata ka Sanad, namar kane ka dei kaba la pyrshah lypa ïa ka riti synshar ba kitei ki kyndon aiñ ka Mylliem Act bad ruh jong ka KHADC ka la khang pyrshah ban long rangbah shnong da kiwei pat ki jaidbyrniew bad kumba long mynta ki Paid Garo ki dei tang ki raioit bad kim dei ki khun ki hajar ba kim don hom ban ioh long rangbah shnong.

Nalor kata na ka liang kitei ki nongïalam ha kane ka jingïakynduh ïa u CEM ka KHADC bad Syiem ka Hima Mylliem ki la ujor ruh ba dang don ki Rangbah Shnong Garo haduh mynta ki dang pyndonkam ïa ka muhor (seal) bad ka Letter Head Rangabh Shnong wat hadien ba la pynmih hukum da ka ophis u Syiem bad ka Dorbar Hima Mylliem lyngba ka shithi No.MS/V-15/2023/804-13 dated 16/05/2023.

Ki la ong ruh kum ka Synjuk ki SSS Byrnihat Area, ki kwah ruh ban ioh jingtip na ka Hima Mylliem haduh katno na ki Shnong Garo kiba la pynphai ïa ki Seal bad ka Letter Head sha ka Hima Mylliem bad balei kim burom ïa ka hukum jong ka Hima Mylliem wat la ki la tip shai ba kim don hok ban ioh long rangbah shnong katkum kitei ki kyndon aiñ.

Nalor kata ki la pynpaw ruh ba ka jingdawa ban ioh sanad ki Rangbah Shnong Garo ka long kaba ym don nongrim satia bad kane ka dei tang ka jingthmu ki jaid bynriew Garo ban tuklar bad mushlia ïa ki riti synshsar shnong jong ki Khun Khasi ba ki la tip shai ba kim don hok satia.

Shuh shuh na ka liang u Chairman ka Synjuk, u Kitbor Suting ki la kyntu jur ïa ka KHADC bad ruh ïa ka Hima Mylliem ba ki dei ban pynneh pynsah ïa ki kam synshar bad ki riti ki dustur jong ki Khun Khasi kaba dei katkum ka riti (Customary Practice) ba la buh da ki Longshuwa ki Manshuwa  bad kim dei ban ailad ba ki Garo kin ioh ban long rangbah shnong namar kane ka long pyrshah ïa ka riti synshar shnong ba dei tang ki khun ki hajar ki dei ban ioh bat ïa katei ka kyrdan Rangbah Shnong bad ym ki raiot, u la bynrap.