Iakynduh ka synjuk ki muster roll ia u Conrad Sangma ban pynjem iaki jingeh jong ki

Syllad | The Rising MeghalayaJuly 20, 2024

Ka All Jaiñtia Muster Roll Workers & Labour Union (CEC), ha ka jingïalam ka Kong M Shangpung Vice President bad u Khroo L Pariat adviser, ryngkat ki dkhot ka seng, haka 19 tarik Naitung kila iakynduh ïa u Conrad K Sangma, Myntri Rangbah ka jylla, ryngkat u Bah Shakliar Warjri, Myntri Labour, Employment & Skills development bad kiwei.

Ki jingïakren kynthup ka jingpynkiew ïa ka bai bylla sngi (Minimum wage) katkum ka Minimum Wage Act 1948, kaba dei ban pynkiew man ka san snem katkum ka dor ki marbam ha ïew. La kyrpad ruh ban pynkiew ïa ka snem shongthait na ka 58 sha ka 62 snem, namar ka sorkar jylla kam ai pisa bai bam tymmen sha ki nongtrei bylla.

La ïakren ruh halor ka jingshah ot bai bylla ki nongtrei ha ka tnat pule puthi ka Sorkar. La kyrpad ïa u Chief Minister ban ïa kren bad ka Sorkar India ban pynkiew ïa ka honorarium sha ki nongshetja sngi (PM POSHAN) ha ki school ha ka jylla.

U Conrad Sangma u la pdiang ïa kine ki jingkyrpad bad bthah ïa u Bah Shakliar Warjri ban pynkhreh ïa ka jingtyrwa lyngba ka Sub-committee ha ka jingialam u Labour Commissioner. Ka tnat Labour kan dang bishar bniah ruh halor ka ban pynkiew ïa ka snem shongthait ki nongtrei bylla.

Ka jingshah ot bai bylla ki nongtrei ha tnat Education ka Sorkar kan shimkhia bad ka seng ka la aipor shibnai ïa u Ambrose Ch Marak, Secretary Education, ban pynbeit kloi halor kane ka mat.

Ka seng ka la dawa ruh na u Bah Shakliar Warjri, ban pyntreikam ïa ka aiñ Maternity benefits Act 1961, kaba ïarap shuti ïoh khyllung ïa ki longkmie bad longkpa ki nongtrei bylla sngi.